بلوچ یکجہتی کمیٹی نا رہشون و بندغی حق آتا باسک آک پارینو کہ بلوچستان نا دیمرئی نا نعرہ خلوکاک بلوچستان ئے پسماندگی آن بیدس ہچ ئس تتنو، لوز آتا سیخہ آن پیش تمیسہ راجی مسئلہ تیکن عملی جہد کروئیءِ۔
دا ہیت آتے بلوچ یکجہتی کمیٹی نا رہشون ڈاکٹر ماہ رنگ بلوچ، ڈاکٹر صبیحہ بلوچ، ڈاکٹر منظور بلوچ، واحد بلوچ، صبغت عبدالحق بلوچ و بیبرگ، بلوچ یکجہتی کمیٹی نا نیمہ آن اڈ مروکا پریس کانفرنس ئٹی کریر۔
ڈاکٹر ماہ رنگ پارے کہ ضلعی کالخواہ آک ہیت ئنا آزادی آ پابندی و بندغ آتان اوفتا ہیت کننگ نا آزادی ئے ہلنگ کن کوئٹہ پریس کلب ئٹی مروکا کانفرنس نا کسرئے بند کننگا ارادے سخت شیف خلینہ۔ کانفرنس نا مسخت بلوچستان نا مسئلہ آتا زیہا اواری ودی کروئی اسک۔
اوفک پاریر کہ گوادرئے واڑ کننگ نا اثر آک بلوچستان و بلوچ چاگڑد آ مرور۔ بلوچستان نا مڈیک ننا بروکا نسل آتا مستقبل ئے رکھیفنگ کیرہ ارافتے بے کچ لٹ ءُ پل کرسا بہا کننگءُ، راج ئے ساحل و مڈی،خودارایت نا پن ئٹ ریفوکا سیاسی پارٹیک اینو ارانگ سلوکو، اوفتے جواب تننگ خوائک۔
اوفک پاریر کہ بلوچستان نا دیمرئی نا نعرہ خلوکاک بلوچستان ئے پسماندگی آن بیدس ہچ ئس تتنو، بلوچستان آن پیش تموکا قدرتی گیس و ساحل نا بہا کننگ نا بدل ئٹ بلوچستان نا بندغ آتے ہچ ئس تننگ متنے۔
ڈاکٹر ماہ رنگ بلوچ پارے کہ گوادرئے واڑ کننگ ملٹرائزیشنءِ ارادے اُلس رد کرینے، نُم دا پاننگ کیرے کہ ہندی بندغ آتے واڑ کرسا قید کیر۔ مشکے آ ہننگ کن نے ویزہ ہلنگ خوائک و ٹھپہ خلنگ خوائک۔ ہندی آبادی ئے کیمپ آتا بٹنگیفسہ سہُب تہ شام اسکان اوفتان زور ئٹ مزوری کریفنگ مریک۔
