سری لنکا نا نائب وزیر دفاع چار شمبے نا دے پارے کہ سری لنکا نا کم آن کم شانزدہ مُسکوہی فوجی روس و یوکرین نا نیامٹی جنگ کریسہ خلنگانو ۔
سری لنکا نا نائب وزیر دفاع پرامیتھا تناکون پارے کہ حکام تینا شہری تے جنگ ٹی بھرتی کننگ نا بابت ئٹ ہنوکا ہفتہ تحقیقات نا بناء کرینے و دائسکان 288 ریٹائرڈ فوجی تہ جنگ ئٹی اواری نا حوال پک مسُنے ۔
او پارے کہ کولمبو ٹی نامہ نگار تون ہیت کریسہ پارے کہ ننتون اوار اوفتان شانزدہ بندغ نا خلنگ نا حوال آک ساڑی ءُ ۔
نائب وزیر دفاع دا پارے کہ سری لنکا آن ہنوکا ریٹائرڈ فوجی جنگ ٹی اِرا ملک ئنا نیمہ آن جنگ کننگ اسُر ۔
ولے حکمران جماعت آن تعلق تخوکا اَسہ قانون ساز گامینء والبودان دو شمبے نا دے پارلیمنٹ ٹی پارے کہ گیشتر بندغ آک روس نا نیمہ آ جنگ ئٹی بھرتی کننگاسُر ۔ نائب وزیردفاع پارے کہ اوفتے بےوقوف جوڑ کریسہ بھرتی کننگاسس و اوفتے پاننگاسس کہ بھاز تنخواہ تننگو و اوفتون جنگ کریفنگ نا جاگہ ایلو کاریم تے کریفور ۔ پرامیتھا تناکون نا پاننگ اسکہ کہ سری لنکا نا ریٹائرڈ فوجی تے بھرتی بندغی اسمگلنگ نا کاروبار نا وڑ ئٹ کننگیک و او فوجی تہ زور تس کہ بھرتی کروکا تہ دھوکا ٹی بفس ۔
