درو خضدار زیروپوائنٹ آ نادرست آ سلابند بندغاتا سُم کاری ٹی محمد اشرف بزنجو پِنی آ ورنا خلّنگا پدا خَلوکاک نرّار۔
خلّنگ آن پد خضدار پولیس نا نیمہ آن خبر ئس شنگ مس کہ محمد اشرف بزنجو خلّنگتنے بلکہ تدینی سیٹی ساہ تسّنے، اراڑا اونا خاہوت جون ئے نال آن پدا ہتسہ کسر آ تخا و برانز کرے۔ خاہوت نا خضدار انتظامیہ نا دا سُبک آ بیان آ غم ئنا درشانی کننگا و کسرئے بند کننگا۔
پدا انتظامیہ ہِنا خاہوت تون مذاکرات کرسہ اوفتا خْواست آتے منّا و خَلوکاتا برخلاف ایف آئی آر آ امنّا کرے۔
دا وخت آ خلنگ مروکا نا خاہوت خضدار نا ہندی آ حوالکار آتون ہیت کرسہ پارے کہ محمد اشرف بزنجو خلّنگوکے پولیس نا داڑان انکار ننے ڈکھ تسّنے ارانا برخلاف نن جون ئے کسر آ تخسہ برانز کرین ۔ برانز آن پد ننا خْواست آتے منّنگا و ایف آئی آر تون اوار خَلوکاتہ دزگیری ئے ہم منّنگا۔
مذاکرات آن پد خاہوت جون ئے دفن کننگ کن پدا نال آ درے و کسر مخلوق کن یلہ کننگا ۔
