نوشت: درناز رحیم
زینب ہم کیہی سوج سینہ ٹی تخِسہ راہی مس۔ اونا خیال دائسکان استاد رفیق تون اس۔ اونا گھام ہرفنگ آن چاہننگاکہ کہ او اخس بے خیالی ئٹ ہِننگ ءِ، اودے تینا نت تا ہفنگ تخنگ نا ہم سُدھ الو۔ اونا زہن ئٹ کلاس نا مسن تا ہیت آک پیری کننگ اسر۔ اسہ دے زینب بریک نا وختا کلاس ئٹ تولوک گڑاس لکھنگ اس، اونا رہا کلاس نا مسنک تولوک مخنگ مسخرہ کننگ اسر۔ اوفتیان اسٹ ٹاکو خلِسہ پارے، “ اڑی اینو رفیق صاحب ءِ خنارے، ہرنگوکا چوٹ تون اسکول آ بسس۔” مسنک ٹہک تسر مخار۔ مسن تیان اسٹ چپس ئنا دانہ ئس باٹی کرسا پارے، “ نی اینو خناس تہ، ای تو درو ہم خناٹ تہ۔ بلکہ چار دے ءِ ہرنگوکا چوٹ تون اسکول آ بننگ ءِ۔” اسٹ پین مخِسہ پارے، “ نُم دا انت ہیت ئس بناء کرینرے۔ مننگ کیک اوڑتون پیسہ اف، نُم ہم کمال کیرے۔” ورندی ترسا اسٹ پارے،” امر پیسہ اف، داخس تنخواہ ءِ امر کیرہ استاد آک۔ تینا زی آ خڑچ کیر، ننے لٹیرہ کنیرہ۔” زینب اُست ئٹ پارے کہ کنا فیس ئے تننگ آن اودے انتس رسینگا؟ او تینکن اندا پیسہ غا تے پُچ پازوار کننگ کریکہ۔
تینا اندا بے خیالی ٹی روڈ آن ہیپار مننگ اس کہ زرہ ئسیٹی گاڑی ئسے نا لتاڑ آن بچا۔ گاڑی والا اوڑا خن تے کرّی کرسا سوختئی ئٹ پارے، “مسڑ کھور اُس بھلا، کسر ئے خنپیسہ ؟ داسا دو ئس نت ئسے آن پناسہ گُڑا امر کریرہ نے؟ زینب نا ہم خنک پھاؤڑینگار ولے خلیس آن ہچ پاتو، مون ئے شیف کرسا راہی مس۔
اُراغا سر مس تو لمّہ مالو آن اونا ودار اس۔ رخت ئنا سیخا ٹی تولوک خن تیا نظر نا چشمک ئس تخوک کشیدہ کننگ اس، زینب درغ آن پیہا الو اونا نظر لمّہ غا تما، لمّہ ہم درغ نا توار آ چشمک نا زیہان اونا کنڈ آ ہُرا۔ زینب سلام ترسا لمّہ نا پاسوئی بس، لمّہ مہر و تجسس ئٹ اونا سلام نا ورندی تس۔ او بس پڑچھ آ تینا بستہ ئے تخا توس۔ لمّہ ہچ پاتو، ولے اونا ہیت ئنا انتظار کرے، اودے سما اس کہ زینب اودے گڑاس پاننگ خواہک اندا سوب آن کوٹی آ ہننگ نا جاگہ غا اول اونا رہا بس توس۔ او زینب نا رغ رغ آن واخب اس، لمّہ غاک تو اندن مریرہ، و لمّہ غا تے اندن مروئی ءِ۔ ولے زینب ہچ پاتو، لمّہ غور ئٹ اونا مون ئے ہُرسہ پارے، ” دیر کنیسہ؟” زینب ہیت کتو، آخہ ٹی لخ ئے سُرفِسہ ورندی تس۔ “ارغ ہم تیار ءِ کنیسہ؟” زینب نا خنک غل غل کریر، “لمّہ! جہان ئٹ مہروان ءُ، بندغ دوست ءُ، ایلو نا دڑد ئے پُہہ مرسا اونا ٹپ آتیا درمان تخوکو بندغ ہم ارے۔”
لمّہ سوج کروکا خن تیٹ اودے ہُرا، ولے ہچ پاتو۔ زینب ہیت ئے برجاء تخِسہ پارے، “لمّہ نے سما ءِ استاد رفیق کنا اِرا تُو ئنا فیس تے تسنے۔ ہمو استاد رفیق ہراڑا کنا کلاس نا مسنک مخارہ کہ اونا چھوٹ آک ہرنگوک ءُ اونا پُچ آک متکن ءُ، او داخس تنخواہ ہلیک امر کیک۔“ لمّہ نا خن تیان خڑینک آک وہار، و زینب ئے بھاکر کرے، کاٹم آن تہ دروت ہلک۔ زینب ہم تینا خڑینک آتے توننگ کتو۔ زینب پین ہیت کننگ کتو، و لمّہ ہم اودے چُپ کرفنگ کن ہچ لوز خنتو۔
سال ئنا گڈیکو تُو ہم گدرینگا و امتحانک مسر۔ رزلٹ نا دے زینب سہب ئنا مالو بش مس تیار مس و لمّہ غان موکل کرسا تینا زرلٹ ءِ ہلنگ کن اسکول آ ہنا۔ او امتحان تیٹ اولیکو پوزیشن ہلکسس۔ او بھاز خوش اس ولے مچٹ فریشان ہم اس۔ اونا خنک استاد رفیق ئے پٹنگ اسر، غٹ استاد آک اینو رزلٹ نا دے اسکول ئٹ ساڑی اسر ولے استاد رفیق الو۔ رزلٹ بشخنگا، چُناک تینا رزلٹ آتے ہلنگ آن گڈ اُرا تیا ہننگ بناء کریر۔ زینب نا اُست خواہسکہ کہ او اُستاد ئے خنوسس، ولے اونا ارمان پورو متو۔
او اُراغا بس تو اونا پد ئٹ ایلم ہم زو اُراغا بس۔ لمّہ اودے خنا تو اسیکہ ہبکہ مس ولدا سوج کرے” پُھل نی کاریم آ ہناسوس ہلہ دن زو بسوس۔ ایلم نا مون پوشکن ہڑسینگاسس، جوڑک تہ بارِسوسر۔ بس توس ولے ہچ پاتو۔ لمّہ فریشانی ئٹ سوج کرے، “ انت مسنے نے، دُن یَند اُس، مون نا پوشکن ہڑسینگانے، جوڑک نا بارِسنو، کاریم آن ہم زو بسوس، تب نا جوانے؟” او فریشانی ئٹ کاٹم ئٹ ہلک و لڑزوکا توار ئٹ پارے، “ ای کاریم آ ہننگ اسٹ لمّہ کنا مون آ سم کاری کرسا منَہ بندغ اسٹ ئسے کھسفیر و نرار۔ نن مچ مسن اودے اسپتال آ درین ولے او اسپتال ئے سر مننگ اسکان ساہ تسس۔” زینب نا خنک پھاؤڑینگار، لمّہ گڑینگوکا لہجہ ٹی پارے، “ ابوو یا اللہ خیر۔۔۔ دیر اس، امروس اس، دیر خلک تہ۔” ایلم نا گٹ خشک مسس،” مخلوق پاننگ اس پن تہ رفیق ءِ، زینب آستا اسکول نا استاد اسے بھازی آن۔ سما اف انتئے خلکر تہ، ولے اندن گمان مریک ڈیتھ سکواڈ والا خلکنو تہ۔ اوڑے مُچ مروکا بندغ آک ہم اندن پاننگ اسر۔” لمّہ زینب ءِ ہُرا و زینب لمّہ ءِ۔ زینب نا جان خید آن چھڑا و خنک تہ اوندھائی مسر، اسیکہ تو اودے گمان مس کہ اونا زی آ آسمان تما۔۔۔ دن امر مس، انتئے دُن مس۔۔۔ لمّہ زو ئس اودے خمب کرے و کاٹم نا تہ خید آتے دو ئٹ پھاکِسہ اوڑتون ہیت کرے ولے زینب اونا ہیت ئے پُہہ متو، اودے گمان مس لمّہ نا توار بھاز مُر آن بننگ ءِ ہرا اونا خف تے اسکان سر مننگ اف۔۔۔
