تونسہ شریف آن پاکستانی لشکر نا دُو آن زوراکی ئٹ بیگواہ مروکا ورنا نا آجوئی کن برانز۔
شابیتی حوال آ تا رد ئٹ تونسہ شریف آن شعیب بلوچ پنی ءُ ورنا ئسینا پاکستانی لشکر نا دُو آن زوراکی ئٹ بیگواہی و غیرقانونی دزگیری نا برخلاف کلمہ چوک تونسہ آ پرایمن برانز کننگا ۔
برانز ئٹی شعیب بلوچ نا خاہوت تون اوار تونسہ شریف آن سیاسی و چاگڑدی باسک آک برانز ئٹی اوار مسُر ۔
شعیب نا خاہوت و برانزیک ریاست آن خواست کریر کہ او کوہ سلیمان ، ڈی جی خان ئٹی غیرقانونی برمتہ،پروفائلنگ و خُلیس نا ماحول ودی کننگ ئے بند کیر و شعیب بلوچ تون اوار زوراکی ئٹ بیگواہ مروکا ایلو کُل بندغ آتے آجو کیر ۔
یاتی مرے کہ تُوو ئس مُست کیہی سلاہ بند نقاب خلوک بندغ آک تونسہ شریف نا اُرا سیٹی بسر و شعیب بزدار ولد خان محمد بولان میڈیکل کالج نا خوانندہ ئے زوراکی ئٹ تینتون اوار دریر ۔
تونسہ شریف برانزیک پاریر کہ بلوچ آتا زوراکی ئٹ بیگواہی تہ تدینیک شروع مسنو بلوچستان تون اوار اینو تیوعہ پاکستان نا ہر شہر ئٹی ریاستی ادارہ آک بدمعاشی کرسہ دے ئٹ بندغ آتے بیگواہ کیرہ اگہ دا تدینی تے توننگ کن توار ہرفنگ متو گُڑا بھاز زوت نن کُل دافتا نشانہ مرون۔
برانزیک خواست کریر کہ حکومت و عدلیہ شعیب بزدار تون اوار ایلو کُل بیگواہ بندغ آتا آجوئی کن تینا کڑدار ئے ادا کیر و بلوچ آتا زوراکی ئٹ بیگواہی نا تدینی تے ختم کننگ مرے ۔
