رئیس گوٹھ حب بلوچستان ٹی کراچی آن وندر کِن سریا دروکا ٹرک لاری نا مالک و ڈریور ئے نارست آ بندغاک بیگواہ کریر و لاری نا مالک ئے خلکُر ہندن ڈریور نا نَت تے تھڑیر بِٹیر۔
پولیس سریا آن خالی آ لاری ئے بھلّا کسر جمالی پُہُل آن خنا۔
کراچی پولیس خلنگ مروکا بندغاتے خننگ ئٹی دسکا بےسُہبءِ۔ خلّنگوکا ڈریور چیزل آباد حب ئنا ہندی سے۔
دا حوالہ ئٹ پاننگک کہ کراچی آن وندر کِن سریا دروکا لاری ئے حب آن خُڑک رئیس گوٹھ اراڑے موچکو پولیس، کسٹم و رینجر چیک پوسٹ آک ءُ۔ چھار سلابند ءُ دُز لاری ئے مالک رزاق مگسی و ڈریور تون اوار توفنگ نا زور آ دزگیر۔
بھاز وخت مننگ آن پد لاری مالک نا تینا اُرا والاتون فون آ حوال متو گُڑا پولیس ئے پاننگا کراچی پولیس اونا خاہوت ئے کراچی اسپتال ٹی تخوکا لاش ئے تس ہندن او لاری نا مالک رزاق مگسی ئے توفک زور ئٹ بیگواہ کرسا پیشتمار ۔
حوال آتا رِدٹ لاری ڈریو ہم کراچی نا اسپتال ئسیٹی علاج مننگ ئٹیءِ ارانا ہرتوما نَت ئے تھڑنگانے۔
خلنگ مروکا لاری نا مالک رزاق حب چیزل آباد ٹی رہینگاکَہ۔
خلنگ مروکا نا مخلوق نا پاننگءِ کہ تدینی رئیس گوٹھ حب بائی پاس کوسٹ گارڈ چیک پوسٹ آن خُڑک مسّنے ۔
خاہوت نا پاننگءِ کہ بیگواہ کروکاک اول لاری ئے حب آ ہتننگ ٹی مسُنو پدا حب ریورڈ کسر نا نیمہ آ دیر۔ ریور کسر آ لگّنگ آن مُست ٹرک مالک ئے خلیسہ اونا لاش ئے غیرآبادی ٹی بٹیر و لاری ئے ناردرن بائی پاس ئٹ سپرہائی وے آ دریر۔
مخلوق نا پاننگءِ کہ ارا ہند آ تدینی مسّنے اوڑے نہ بیرہ پولیس بلکہ کوسٹ گارڈ و رینجز ہم ساڑی ءُ کراچی پولیس داسکا خَلوکاتے ہلّنگ ئٹی بےسُہبءِ۔
ارٹمیکو نیمہ آ لورالائی ٹی چُنکو زر ئسینا جیڑہ آ سُم کاری ٹی اسہ بندغ ئس خَلّنگا۔
لورالائی ناصر آباد ٹی چُنکو زر ئنا جیڑہ ئسیٹ روزی خان باوہ نا پِن باز خان پِنی ءُ بندغ ئس سُم کاری ٹی ٹپی مس، لورالائی اسپتال ئے سرکنّنگا ولے ہموڑے ساہ تس ۔
ہندن ہرنائی شاہرگ ٹی کوئلہ نا مزور ئس تدینی ٹی بیران مس۔
حوال آتا رِدٹ مزور نا لاش ئے مزورک تینا کمک ئٹ کان آن کشّار ۔ مزور محمد یعقوب باوہ نا پِن ابن یامین عمر چِھل ءُ ہفت سال کوہستان نا ہندی سے۔
