گوادر شنکانی در نا ہند آ پاکستانی لشکر نا دُو آن زوراکی ئٹ بیگواہ مروکا لالا رفیق نا خاوت اونا آجوئی کن کوسٹل ہائی وے ئے بند کرے ۔
ہمو وخت آ پولیس نا ہشت لاری ٹی تولوک نرینہ و زالبول پولیس کارندہ آک زالبول و چُناتے آ تشدد کرسہ کسرئے پچ کننگ نو کوشست کریر ۔مُسہ ورنا وہاب ، اصغر و وحید ئے پولیس تینتون دریر ۔
برانزی زالبول آتا پاننگ ئس کہ پولیس کارندہ آک زالبول و چُنا تا تشدد کرسا گر کریر و خلکُر،ہموخت بزرگ زالبول ئسینہ دُو آن یسین شریف ئے پُھلار و شہید کریر ۔
برانزی تہ پاننگ ءِ کہ تینا بندغی آتا زوراکی ئٹ بیگواہی نا برخلاف برانز کننگ اسُن کہ پولیس نا نفری لاری تیٹ سر مس ارافتون زالبول کارندہ آک ہم اوار اسُر ۔ پولیس کارندہ آک زالبول و چُناتے تشدد نا گواچی کریر ، ننا گُد آتے چھکار مُسہ ورنا وہاب ، اصغر و وحید ئے پولیس دزگیر کرسا تینتون دریر ۔
یاتی مرے کہ برانز ہنوکا سال دسمبر ئٹی زوراکی ئٹ بیگواہ مروکا لالا رفیق نا زوراکی ئٹ بیگواہی نا برخلاف کننگ اسُر ۔ لالا رفیق ئے گْوادر کمپلیکس آن چُنا تیتون اوار برمتہ کننگاسس ۔ پدا چُناتے یلا کریر، مُسہ تُو گدرینگ آن پد ہم او دائسکان آجو کننگ متنے۔
گوادر نا مَشی ہند دڑامب ئٹی پاکستانی لشکر نا لشکر کشی ہنوکا اِرا دے آن برجا ءِ ،حوالءِ کہ لشکر کشی ٹی زمینی لشکر آن بیدس چار جنگی ہیلی کاپٹر آک ہم بشخ ہلنگ ءُ ۔ہندا ہند ئٹی پاکستانی لشکر نا قافلہ آک ہم بننگءُ ۔
خضدار نا ہند زہری ٹی ٹریفک تدینی ٹی زالبول ئس بیران مس و ہشت بندغ آک ٹپی مسُر ۔
شابیتی حوال آ تا رد ئٹ زہری چشمہ آن کاٹیلی آہنوکا پک اپ لاری کرش پلانٹ آن خُڑک چپی مس ۔ ارانا سوب آن اَسہ زالبول ئس ہموخت بیران مس و ڈرائیور تون اوار ہفت زالبول آک ٹپی مسُر ۔ تدینی نا حوال رسینگ آن پد ریسکیو کن بروکا لاری ہم تدینی نا گواچی مس اراٹی استاد محمد ابراہیم ڈائیہ پنی ءُ بندغ ئس ٹپی مس ۔ ٹپی مروک آتے اسپتال آ دریر اراڑے اوفتے علاج کننگ ءُ اوفتا حالیت خطرہ آن پیشنءِ ۔
