بلوچستان نا ضلع ہرنائی نا ہند زردآلو نا کوئلہ کان ئٹی ہنوکا شام تراک ئنا سوب آن 18کان کن کوئلہ کان نا تہٹی پھسینگار ۔
چیف مائنز انسپکٹر عبدالغنی پارے کہ ہرنائی نا ہند زردآلو ٹی ہندی کول کمپنی کول مائن ئٹی گیس پُر کننگ آن تراک مس ارانا سوب آن 10 کان کن تہٹی پھسینگار، پھسینگوکا کان کن آتے کان آن کشنگ کن پین ہشت کان کن تہٹی ہنار ، ولے کان تولنگ نا سوب آن او کان کن آک ہم پھسینگار ۔
تدینی نا 10 گھنٹہ پد 12 کان کن آ تا جون آ تے کشار و ایلو ہشت کان کن آتے زندہ کشار ۔
ہنوکا سال بلوچستان نا کوئلہ کان آ تیٹ مروکا 51 تدینی تیٹی 69 بندغ کھسکُر و 29 ٹپی مسُر ۔
محکمہ معدنیات نا کالخواہ نا رد ئٹ بلوچستان نا ہند مچ ،دکی ،شاہرگ ،چمالانگ و کوئٹہ نا کوئلہ کان آ تیٹی مروکا 51 تدینی تیٹی 69 کان کن کھسکُر و 29 ٹپی مسُر ، گیشتر آ موت میتھین گیس ئنا پُر مننگ نا سوب آن تراک آتیٹ مسُنو ۔
سال 2022 ئٹی بلوچستان نا کوئلہ کان تیٹی 55 تدینی تیٹی 70 آن زیات کان کن کھسکُر ۔
بلوچستان ئٹی زیرزمین کان کنی گیشتر پلر اینڈ روم وڑ ئٹ کننگک ۔ اراکہ کان کنی نا کُل آن خطرناک انگا طریقہ ءِ و تیوعہ جہان ئٹی دا طریقہ ءِ بند کرینو۔
مزدور آ تیکن مہم چلفوکا و ریسرچرز آک دا ہیت آ زور شاغانو کہ کان کنی نا پُوسکنا طریقہ آ تے کارمرز کیر و کان کن آتے ذاتی حفاظتی سامان تیر ، اراٹی ساہ ہلنگ کن ماسک ،چشمہ ،آکسیجن سلینڈر و گیس ئنا کچ ئے ہروکا سامانک اوار ءُ ۔
