کابل : پاکستانی جیٹ جہاز آک اوغانستان نا اِرا سرحدی صوبہ ، صوبہ خوست و صوبہ پکتیکا آ بمباری کریر اراٹی کیہی بندغ آتا خلنگ نا حوال ءِ ۔ شابیتی حوال آتا رد ئٹ ہفت و ہشت روچئی نا نیامی شام سہور نا وخت آ دہشت گرد آ تا نرسری پاکستان نا جیٹ جہاز آک اوغانستان آ ہنپوک آتا اُراتا بمباری کریر اراٹی کیہی زالبول و چُناک خلنگار ۔
ہندی حوالکار آ تا رد ئٹ بمباری مُسہ چار جاگہ آ کننگانے ، اراٹی کیہی زالبول و چُناک خلنگانو ، اوفتا اُراک ہم بھُس مسُنو ۔
ایلو نیمہ آ پاکستان طالبان ہندا بمباری نا بابت ئٹ درشان ئسیٹی پارے کہ ، حوال ارے اینو سہور نا وخت روچئی نا تقدس ئے پامال کرسا ہمسایہ ملک اوغانستان نا اِرا صوبہ ( پکتیکا ، و خوست ) ئٹی جہانی غنڈہ گرد پاکستان دہشت گرد ریاست مظلوم آ تا اُرا تا بیدس سوب آن بمباری کرینے ارا کیہی سال آن پاکستان نا ظلم آ تان تنگ مننگ آن اوغانستان آ ہنپیسُر ۔
حوال آ تا رد ئٹ پاکستان نا دا بے رحمانہ بمباری ٹی کیہی زالبول و چُناک شہید مسُنو ۔
درشان ئٹی مونی پاننگا کہ کیہی حوالکار آک دا ظالمانہ بمباری ئے پاکستان طالبان نا برخلاف کاروائی پارینو ، و کمانڈر عبداللہ شاہ ئے نشانہ کننگ نا ہیت مننگءِ ، دا بابت ئٹ نن کیہی وار مالو ہم پارین اُن کہ ننا سنگت آک تینا سرزمین آ پاکستان نا ظلم وجبر ئنا مقابلہ کننگ ءُ ، و کمانڈر عبداللہ شاہ ہم دا وخت تینا سرزمین آ دشمن وطن تا برخلاف جہد کننگءِ ۔
ضرب عضب نا سوب آن وزیرستان آن ہزارہ آتا کچ ئٹ خاوت آک اوغانستان آ ہمپنگ کن مجبور مسُنو ۔ ارافتا پاکستان بمباری و گولہ باری کیک پدا جہان نا مونا ہندا پروپیگنڈہ ئے کیرہ کہ نن پاکستانی طالبان آتا برخلاف کاروائی کرین اُن ۔
یاتی مرے کہ میڈیا آ ارا کمانڈر نا اُرا و اودے نشانہ کننگ نا دعوی کننگ ءُ او ویڈیو درشان ئس ہم شینگ کرینے ہراٹی او پائیک کہ ای زندہ اُٹ و جنوبی وزیرستان نا تحصیل شتکوئی ٹی ساڑی اُٹ میڈیا آ ارا دعویٰ کننگ ءُ دا کُل دروغ و پروپیگنڈہ ءُ ۔
