لاڑکانہ ٹی ہدایت لوہار نا کوش ئنا برخلاف برانز آ پولیس نا لاٹھی چارج، ہدایت لوہار نا مسڑ سسئی تون اوار کیہی سندھی باسک آک دزگیر۔
سندھ ئنا شہر لاڑکانہ ٹی ہدایت لوہار نا کوش ئنا برخلاف برانز کننگا پولیس نا نیمہ آن لاٹھی چارج، زالبول و نرینہ باسک آتون کیہی بندغ آتے پولیس دزگیر کرسا تھانہ آ درے۔
سندھی راجدوست و بندغی حق آتا باسک آک ہدایت لوہار نا کوش ئنا برخلاف ہنوکا کیہی دے تیان تیوعہ سندھ ئٹی برانز کننگءُ۔
لاڑکانہ پولیس برانزی تہ تشدد آن پد ناری جمہوری محاذ رہشون کامریڈ فوزیہ سینگار، خلنگ مروکا ہدایت لوہار نا مسڑک و وائس فار مسنگ پرسنز سندھ ئنا کنوینئر سسئی و سورٹھ لوہار تون اوار پی آر ایس ایف نا امجد سندھی و بھاز انگا باسک آتے دزگیر کرسا تینتون دریر۔
برانزیک ہدایت لوہار نا کوش ئنا برخلاف سسئی لوہار نا بھلُنی ٹی پریس کلب نا مونا برانز کننگ اسُر،دزگیری تہ برخلاف بندغ آک سخت نعرہ بازی کریر۔
ہنوکا توو باوہ نا کوش و انتظامیہ نا نیمہ آن مقدمہ نوشتہ کپننگ نا برخلاف سورٹھ لوہار و سسئی لوہار تون اوار سندھ ئنا راجدوست پارٹی تہ نیمہ آن پنچ دے اسکان برانز آن پد سندھ ئنا جتا جتا انگا شہر آتیٹی برانز مننگءِ۔
ہدایت لوہار نا کوش ئنا دوبہ ئے اونا خاوت و سندھی راجدوست تنظیم آک پاکستانی لشکر آ خلکنو و اوفتا خواستءِ کہ جہانی ادارہ آک تدینی نا نوٹس ہلیسہ پاکستان آن پٹ و پول نا خواست کیر۔
