گْوادر : بلوچ یکجہتی کمیٹی نا راہشون ڈاکٹر ماہ رنگ بلوچ تینا توار بند ئس شنگ کرِسہ پارے کہ گْوادر نا راستی انت ئسے ؟ اسہ دروغ ئنا میگاپروجیکٹ ئس جوڑ کننگ مسُنے ، ہندا پروجیکٹ آن پد پاننگ مسُنے کہ گْوادر نا شہر و گْوادر نا تولوک آتا مستقبل جوان مرو، ولے راستی دُن اف ۔
او پارے کہ گْوادر نا راستی ہندادے کہ مستقبل نا پن آ ہر جاگہ و دمہ ٹی اسہ چوکی ئس اڈ تننگانے ۔ کوسٹ گارڈ مرے یا پاکستان نا ایلو لشکر بندغ آک اُراتیٹی چھاپہ خلیسہ ورناتے برمتہ کیرہ ۔ اوفتے دا موکل تننگانے کہ گْوادر نا بندغ آتا سد سال ئنا روزگار پُلنگ مسُنے ۔ اینو تنیا نہ کُل گْوادر نا ہزار آتا کچ ئٹ بندغ آک بے اُرا مسنو بلکہ اوفتا روزگار آک ہم پُلنگانو ۔ گْوادر نا بندغ آک امر زندئے گدریفر ،ولے کس ئسے سما اف ۔
ڈاکٹر ماہ رنگ بلوچ پارے کہ بلوچ یکجہتی کمیٹی گْوادر نا تہٹی تینا کاریم تے بِنا کرینے و دا کاریم کن نن اسہ سرپدی دیوان ئس اڈ تینہ ۔ دا دیوان ئٹی نن زانتکار آتے پارینُن ، تاکہ چائنگ مرے کہ گْوادر نا تہٹی ہمو حالت آک ودی مسنو ، گْوادر ارا حالیت ئٹیءِ ہمو پِر گْوادر آ بسُنے اونا سوب انتءِ انتئی گْوادر نا بندغ آتا توار بنِّنگ متنے ۔ نن اوفتا توارئے بِنّنگ خواہنہ ۔ او استاد و شاعر مریر یا دریا بان مریر اوفتا توارئے کس بنتنے ۔
او پارے کہ ای کُل آن خواست کیوہ کہ بی وائی سی نا سرپدی دیوان پگہ یازدہ بجہ آ غوص بخش بزنجو اسٹیڈیم آ مرو، اوفک تینے سر کیر و کالخواہ تہ ہمراہ داری ئے کیر تانکہ دا دیوان ئے جوانو وڑ ئسے ئٹ مونا دننگ مرے ۔ ہمو توار ئے کہ ریاست ڈھکانے ہمو توارئے تینا راج و کُل جہان ئے سر کین۔
