تربت آن زوراکی ئٹ بیگواہ آ جمیل محمد جان الندور بلیدہ نا ہندی ئے پاکستانی ڈھکوک ادارہ آک سی ٹی ڈی نا حوالہ کریر ۔
ہندا ورنا 9 نومبر 2023 آ تینا سنگت دوست شیران تون اوار بیگواہ مسس ، شیران بلوچ ئے ہنوکا سال نا آخیر ئٹ آجو کننگا و جمیل محمد جان ئے ہنوکا دے منظر مون ہتیسہ سی ٹی ڈی نا حوالہ کریر ہراڑے خاوت تون ملفیرتہ ۔
یاتی مرے کہ سی ٹی ڈی بلوچستان ئٹی داکان مُست کاروائی تیٹ کیہی بندغ آ تا دزگیری نا دعویٰ کرینے ،مُست آن بیگواہ مروکا تہ پن ئٹ اوفتا پجار مسُنے ۔
سی ٹی ڈی نا نیمہ آن کیہی دروغ ئنا مقابلہ کننگانے ہرافتیٹ مُست آن بیگواہ مروکا تے خلکُنو ۔
بلوچستان ئٹی زوراکی ئٹ بیگواہی تہ برخلاف کاریم کروکا تنظیم وائس فار بلوچ مسنگ پرسنز نا وائس چیئرمین ماما قدیر بلوچ نا پاننگءِ کہ ڈھکوک ادارہ آک سی ٹی ڈی ئے ڈھال جوڑ کرسہ بے میار فرزند آ تے برمتہ و شہید کننگءُ ۔
ہنوکا سال 9 مارچ آ حب ئنا ہند دارو ہوٹل آن خُڑک اُرا آ چھاپہ نا وخت پاکستانی لشکر نا دُو آن زوراکی ئٹ بیگواہ مروکا جاوید ولد غلام قادر آجو مس ۔
