کیچ ئنا علاقہ سامی ٹی سی پیک کسر آ بیگواہ واحد بخش نا خاہوت و حکومتی وفد نا نیام ئٹ گپ و تران اسہ وار پدا بے سوب مس۔
خاہوت پن کروک بندغ نا یلہ کننگ نا شڑط تخا، کمشنر مکران 10 فروری اسکان وخت خواہا۔
خیال مرے کہ سامی آن اسہ ہفتہ ئس مالو بیگواہ کننگوک 65 سالی پیر محمد نا مار واحد بخش نا زوراکی نا بیگواہی نا برخلاف سامی ٹی سی پیک کسر ایم ایٹ آ اسہ ہفتہ ئسے آن تولوک برانز برجاء ءِ ہرا نا سوب تربت نا ڈغاری حوالکاری کوئٹہ، خضدار، قلات و پنجگور آن کشکنگانے اندن دا وخت ئٹ بھلو کچ ئسے آ مسافر آک ہم گٹ ءُ و مال بردار گاڑیک اسہ ہفتہ ئسے آن مڈی آن پُر سلوک ءُ۔
اینو کمشنر مکران ڈویژن سعید احمد عمرانی مسکوہی صوبائی وزیر میر ظہور بلیدی تون اوار تولوک برانز نا جاگہ غا خاہوت تون گپ و تران کرے و 10 فروری اسکان اونا یلہ کننگ کن وخت خواہا اندن استو ننکان تولوک برانز آ پولیس نا جلہو و حق دو تحریک حق پرست نا سروک محمد یعقوب جوسکی نا آجوئی و اوڑا خلوک مقدمہ تے ایسر کننگ نا باوری کرفے ولے بیگواہ واحد بخش نا مسڑ دا سَلاہ ئے رد کریسہ تینا باوہ نا یلہ کننگ و اودے رکھوک برانز جاہ آ سر کننگ نا دروشم ئٹ برانز ئے ایسر کننگ نا شڑط ئے تخا ہراڑا حکومتی وفد اسہ وار پدا بے سوب مس۔
تربت ئٹ بیگواہ بندغ تا خاہوت آک پگہ شٹرڈاؤن ہڑتال نا پڑو کرینو۔
ایلو پارہ غان ڈی بلوچ پوائنٹ آ بیگواہ بندغ تا یلہ مننگ کن تولوک برانز برجاء ءِ۔ برانز کروک آک پگہ دو شمبے آ تربت ئٹ شٹرڈاؤن ہڑتال نا پڑو کرینو۔
اوفک تاجر برادری، سول سوسائٹی و سیاسی ٹولی تیان شٹرڈاؤن ہڑتال ئے سرسوب کننگ نا خواست کرینو۔
