بلوچستان ئٹی زوراکی ئٹ بیگواہی تا برخلاف کوئٹہ پریس کلب نا مونا وی بی ایم پی نا بین برانز گدانءِ 6400 دے پورو مسونے۔
اندا موقع آ زوراکی ئٹ بیگواہ کننگوک آ صغیر بلوچ نا ایڑ پارے کہ اونا ایلم صغیر بلوچ و کزن اقرار بلوچءِ 11 جون 2025 آ اورماڑہ چیک پوسٹ آن دزگیر کننگ آن پد بیگواہ کرینو۔ گواہ تا بیان و کیس ئنا بابت ئٹ سماعت آتیان پد ہم تومکاک دائسکان آجو متنو، ہرانا سوب آن خاہوت سخت ذہنی اذیت نا گواچیءِ۔
وی بی ایم پی نا چئیرمین نصر اللہ بلوچ خواست کرینے کہ صغیر احمد، اقرار بلوچ تون کُل بیگواہ کننگوک آ بندغ آتے آجو کننگ مرے، اگہ اوفتا دوبہ ئس ارے گُڑا 24 گھنٹہ ٹی اوفتے مجسٹریٹ نا مونا پیش کرسا قانونی کاروائی کننگ مرے۔
او پارے کہ بیگواہ کننگوک آ بندغ آتا بابت ئٹ خاہوت ءِ حوال تننگ مرے ، تدینی تا پھاش پٹ و پول و ذمہ دار تا احتساب نا خواست کرینے۔
