کیچ: دہ دے مُست پاکستانی لشکر نا دو آن زوراکی ئٹ بیگواہ کننگوک آ ورنا چنگیز بلوچ ولد محمد ابراہیم نا خاہوت نا پاننگ ءِ کہ ننا چُنائے فوج زندان ئٹی خلکنے و داسا اونا جون ئے ننے تننگ افس۔
خاہوت نا رد ئٹ چنگیز بلوچ کیچ ئنا ہند بلیدہ نا ہندی سے ہرادے 04 ستمبر نا شام ئنا یانزدہ بجہ غا پاکستانی لشکر تربت آپسر آن دزگیر کرسا بیگواہ کرینے۔
خاہوت نا پاننگ ءِ کہ چنگیز بلوچ نا آجوئی کن نن جتا جتا ادارہ تون رابطہ کرینن ۔ پدا ننے فوج ئنا نیمہ غان پاننگانے کہ چنگیز زندان ئٹی بیران مسونے و فوج اودے دفن کرینے۔ چنگیز بلوچ نا جون ئنا عکس ئے ہم نشان تسونو۔
خاہوت نا پاننگ ءِ کہ چنگیز بلوچ ئے دزگیر کننگ آن مُست پاکستانی لشکر و ڈھکوک ادارہ آک بلوچ سیاسی باسک آتا مخبری کن پارینو ۔ چنگیز اوفتا مخبری کن منیتنے۔
