حوال تا رد ئٹ خضدار نا تحصیل وڈھ ئٹی شام ئنا دہ بجہ غا ایف سی نا کارندہ غاک عزیز گرگناڑی نا اُراغا چھاپہ خلیسا اُراٹی سُم کاری کریر، ہرانا سوب آن چھار بندغ خلنگانے و اسہ زالبول ئس ٹپی مسونے۔
ایلو نیمہ غا زہری بلبل ئٹی درو نا دے بمباری نا سوب آن 13 سالی آ چُنا شفیق ولد ابراہیم خلنگانے و دہ آن گیشتر ساہدارک ہم خلنگانو ۔
بی این پی نا ترجمان نا رد ئٹ سونارو پاٹ جھل، کلی یار محمد ئٹی استو ایف سی نا نیمہ غان لس مخلوق آ سُم کاری ٹی چھار بے گناہ و معصوم آ بندغ آتا شہادت و زالبول ، چُناتا ٹپی کننگ نا سخت لوز تیٹ مذمت کینہ۔ تدینی آن پد ہندی بندغ آک استو آن کوئٹہ کراچی کسر ئے بند کرینو۔
بیان ئٹی پاننگانے کہ لس شاری تے ٹک کننگ و بندغ آتے خلیس نا گواچی کننگ سخت بےدڑد و ناقابل قبول عمل ئسے۔ فارم 47 نا کالخواک تینا سیاسی مفاد کن بلوچستان ئٹی دتر تون گوازی کننگ ءُ ۔ فوج ئے بے لغام الانو ہراکان لس بندغ آتا جان و مال رکھوک اف ۔ طاغت ، بےدادی و خلیس ئٹ بلوچستان نا مخلوق ئے بے توار کننگ مفک۔ چھار بے گناہ تا شہادت و چُنا و زالبول آتے ٹپی کننگ بندغی حق آتا لتاڑنگ ءِ۔ ترجمان ہندی بندغی تنظیم آتیان خواست کرینے کہ اوفک دا تدینی نا نوٹس ہلیسا پاش و غیرجانبدار انگا پٹ و پول کن تینا توار ئے بُڑز کیر ۔ بے گناہ انگا شاری تے شہید کروک آتے قانود نا رد ئٹ سزا تننگ کن تینا کڑدار ئے ادا کیر ۔
