خضدار شار آن پاکستانی لشکر نا کیمپ آن خُڑک ڈیتھ اسکواڈ نا کارندہ غاک بی این ایم نا راہشون و مُسکوہی وائس چیئرمین ڈاکٹر خدابخش بلوچ نا ایلم ئے دزگیر کرسا بیگواہ کرینو۔
زرمبش حوالکار نا رد ئٹ قادر بخش بلوچ ولد حاجی محمد رمضان بی این ایم نا راہشون ڈاکٹر خدا بخش نا بھلا ایلم ءِ و خضدار نا ہند باغبانہ نا ہندی سے۔ او ملخُدو اُراغان خضدار شار آ ہننگ ئٹی مسونے کہ کسر آن ڈیتھ اسکواڈ نا کارندہ غاک اودے دزگیر کرسا بیگواہ کرینو۔
قادر بخش بلوچ نا بابت ئٹ پاننگ ءُ کہ اودے مُست 2021 آ چُنا تون اوار فوج دزگیر کرسا بیگواہ کریسس۔ بھاز بےدادی آن پد آجو کننگاسُر۔ ایلو وار اودے جون 2026 آ ڈیتھ اسکواڈ نا کارندہ آک دزگیر کرسا بیگواہ کریسُر پدا مُسہ دے آن پد آجو کننگاسس۔ دا مُسٹمیکو وار ءِ کہ اودے بیگواہ کننگانے۔
