بلوچ نیشنل موومنٹ نا چیئرمین ڈاکٹر نسیم بلوچ شہید نواب اکبر خان بگٹی نا شہادت نا بیس میکو سال ئنا پورو مننگ آ تینا درشان ئٹی پارے کہ شہید نواب اکبر خان بگٹی نا شہادت ئے بیست سال پورو مسُنے ولے اینو ہم بلوچستان نا سیاسی تاریخ و بلوچ مزاحمت نا پِڑ ئٹ اونا پن ئنا بھلو ارزشت ئسے۔
ڈاکٹر نسیم بلوچ پارے کہ نواب اکبر خان بگٹی تینا زند ئٹی بلوچ اُلس ئنا سیاسی حق آتا رسینگپنگ و بلوچ راج ئنا برخلاف زوراکی تے خنا ،او تینا زند ئنا گُڈی وخت آ تینا سیاسی نظریہ غان پدی مرسا مش تیا ہِننگ نا فیصلہ ئے کرے ۔ 2006 آ اونا شہیدی بلوچستان نا اینو نا تاریخ ئٹی اسہ بھلو ویل ئس جوڑ مسونے۔
او پارے کہ نواب اکبر خان بگٹی بیرہ اسہ ٹک ئسینا سردار یا مسکوہی گورنر ئس متنے ، بلکہ او اسہ سیاست دان ئسے ۔ او بلوچستان نا جیڑہ ئے بلوچ آتا پجار ، سیاسی اختیار، عزت ءُ بروک آ وخت آ تینا فیصلہ کننگ نا اختیار کن جہد کرینے۔
بلوچ نیشنل موومنٹ نا چیئرمین پارے کہ فوجی زوراکی نا سوب آن نواب بے توار مسونے ولے ارا جنجال و جیڑہ تیکن او توار بُڑز کرینے ، او جہد ایسر متنے ، بیست سال آن پد ہم ہمو مسلہ دائسکان فیصلہ کن سلوکءِ۔
ڈاکٹر نسیم بلوچ پارے کہ ای شہید نواب اکبر خان بگٹی نا شہیدی نا بیست میکو سال ئنا پورو مننگ آ اودے شرف ئٹ یاد کیوہ۔
