مستونگ نا ہند کھڈ کوچہ ٹی پاکستانی فوج ئنا ڈرون جلہو ئٹی چار مزور خلنگانے و مُسٹ ٹپی مسُنے۔
خلنگ و ٹپی مروکا بندغ آتا جون تے اسپتال آ دننگانے۔
حوال تا رد ئٹ خلنگ مروکا مزور تا چائنداری گل خان مغیری، عمران براہوئی، عبداللہ براہوئی و جہانزیب ابڑو نا پن تیٹ مسُنے، ہرا کچھی نا ہند حاجی شار ئنا ہندی ءُ۔ پین مُسہ مزور ٹپی مسُنے۔ دا مزور آتے ہمو وخت آ نشانہ کننگانے ہراتم او باغ ئٹی مزوری کننگ ئٹی مسُنو۔
یات مرے کہ چار دے مُست مستونگ نا ہند کھڈ کوچہ ٹی پاکستانی فوج ئنا ڈرون جلہو ئٹی سندھ ئنا ہندی بزغر ئس خلنگاسس۔ ہرا نا چائنداری حبیب اللہ نا پن ئٹ مسس، ہرا سندھ لاڑکانہ نا ہندی ئس اس۔ پن کروکا بندغ ئے پاکستانی فوج ڈرون ئٹ کھڈ کوچہ شریف آباد ئٹی ہمو وخت نشانہ کریسس ہراتم او تینا کِشار آتیٹی کاریم کننگ ئٹی مسسس۔
