مستونگ ، سوراب ءُ خاران ئٹی پاکستانی لشکر نا نیمہ غان لشکر کشی برجاء ءِ ۔
حوال تا رد ئٹ مستونگ نا ہند دشت کمبیلا ٹی پاکستانی لشکر اسہ اُرا ئسے آ کواڈکاپٹر ئٹ جلہو کرینے، ہراڑان اسہ زالبول ئس ٹپی مسُنے ۔
ایلو نیمہ غا سوراب ئٹی پاکستانی لشکر نا لشکر کشی برجاء ءِ ۔ لشکر اُرا تیا چھاپہ خلکُنے ءُ پٹ ءَ پول کرینے۔ ہندا وخت آ لشکر خلیل احمد ولد نور محمد تون اوار اِرا بندغ ئے دزگیر کننگ آن گُڈ بیگواہ کرینے ۔
ہندا وڑ خاران نا ہند تازینہ ٹی اینو سوب ئنا پاکستانی لشکر ، لشکر کشی کرسہ ماٹر گولہ خلکُنے ءُ کواڈ کاپٹر ہم کارمرز کرینے۔ کواڈ کاپٹر آتا بمب گواری آن مسُہ ہیٹ کھسکنے، داسکان پین بندغ آتا دزگیری ءُ جانی نسخان نا حوال اف۔
ہندی حوال تا رد ئٹ سلاہ بند بندغ آک لشکر نا اسہ کواڈ کاپٹر ئسے بُھس کرینو۔
