بی وائی سی نا شنگ کروک درشان ئسیٹی پاننگانے کہ کامران بلوچ خضدار نا ہند مولہ نا ہندی ئسے و ایف ایس سی نا خوانندہ ئسے ہرادے 08 جولائی 2026 آ خضدار ئٹی ڈیتھ اسکواڈ نا کارندہ آک خلکُر۔
درشان نا رد ئٹ کامران بلوچ نا کوش بلوچ مخلوق نا برخلاف برجاء انگا زوراکی و بلوچستان ئٹی بندغی حق آتا لتاڑنگ نا خراب انگا روشت ئے نشان ایتک۔
بی وائی سی نا رد ئٹ بلوچستان ئٹی بلوچ مخلوق نا نسل کشی ہڑدے گیشتر مننگ ءِ، دُنو دے ئس اف کہ اسہ بلوچ ئس خلنگ مفک۔ خاہوت آتے اوفتا بندغ آتا جاگہ غا جونک دو تمرہ۔
جارکش پارے کہ اگہ بلوچستان ئٹی انصاف و قانود مروس گُڑا دا وڑ ئنا زوراکی برجاء متوکہ۔ نشانہ کننگ، غیرقانودی کوش، دروغ ئنا مونتس و زوراکی ئٹ بیگواہیک اندُنو خلیس ئس ودی کرینو کہ ہچ بلوچ ئس تینے رکھکوک محسوس کپک۔ وختس کہ اسہ بندغ ئس اُراغان پیشتمک گُڑا خاہوت خُلیس نا گواچی ءِ کہ دیچہ او زند اُراغا برو یا تنیا اونا جون اُراغا سر مرو۔
بی وائی سی اقوام متحدہ، جھانی حق آتا ادارہ و انصاف و بندغی حق آتیکن توار بُڑز کروک کُل ادارہ تیان خواست کرینو کہ اوفک بلوچستان ئٹی بندغی حق آتا خراب انگا حالیت آ پام ایتر۔ انتئے کہ داڑے کس ئس رکھوک اف، نہ خوانندہ، نہ استاد، نہ ڈاکٹر، نہ مزور و نہ ایلو شاریک۔ بندغ آتے اسہ حساب ئٹ زوراکی ئٹ بیگواہ و نشانہ کننگِک و ایلو بندغی حق آتا خلاف ورزی مننگ ءِ۔
