بلوچ اسٹوڈنس آرگنائزیشن آزاد نا بنجاہی جارکش شولان بلوچ پارینے کہ بلوچ راجی آجوئی نا تحریک کُل سختی و زوراکی تیان پد ہم نہ بیرہ روان ءِ بلکن دے پہ دے آن پین سوبر و سبر مننگ ئٹی ءِ۔ تحریک نا کُل محاذ آتا بلوچ راج ئنا عظیم انگا فرزند آک تینا راجی ذمہ واری تے پورو کرِسہ پاکستانی زوراکی تا برخلاف جدوجہد کننگ ئٹی ءُ۔ ایلو پارہ غا ننا عظیم انگا شہید آتا سدخئیک، زندان تیٹی قید اسیر آتا ہمت و زوراک نا برخلاف مزاحمت نا سوب آن اُلسی سطح آ آجوئی نا جہد ئٹی اواری و مُخ تفی دے پہ دے آن ودھنگ ئٹی ءِ۔
جارکش پارینے کہ بلوچ راجی جُنز(تحریک) نا مقبولیت، آجوئی نا بارو ئٹ شعور و عملی میدان ئٹی اُلسی اواری ٹی ودکی آن پاکستانی ریاست شکست نا گواچی ءِ۔ بلوچ راج اولی دے آن پاکستانی لشکر نا قوضہ ئے آن انکار اونا برخلاف مزاحمت کرینے، ولے داسہ تیبہ غا راج اسہ جاگہ غا قوضہ نا برخلاف مزاحمت ئٹی ءِ۔ قوضہ گیر بلوچستان نا عملی میدان ئٹی شکست کُننگ آن پد بیرہ میڈیا ٹی گمراہ کروک پروپگنڈہ اسکان محدود ءِ۔ وخت ئس کہ بلوچ راجی جنز ئے نزور کننگ نا کوشست ئٹی ءِ ریاست بلوچ راج ئے خلیس نا گواچی کرِسہ اوفتا جائز آجوئی نا جنز آجوئی آن دو کشنگ نا بے سوب کوشست ئٹی ءِ ہرانا پک مثیل بلوچستان ئٹی روان زوراکی ءِ۔ او مُستی پارے کہ بلوچ راجی جنز ئٹی اوار انگا تا زوراکی ئٹ بیگواہی، جشوک آ جون تا خسنگ، خاہوت آتا ہڑدے بیداد کننگ اجتماعی سزا تننگ، اوفتا اُراتا بھُس کننگ تون اوار ایلو قوضہ گیر نا چم تا بشخ جوڑ مسنے۔
ایلو پارہ غا زوراکی ئٹ بیگواہ مروک آتا وے قانودی خلنگ و جون تا خسنگ داسہ لس مسنے۔ ہندا دے تیٹی گوادر نا علاقہ جیونی ٹی پانوان نا ہند آ پنچ زوراکی ئٹ بیگواہ بلوچ فڑزند آتے دروغ جنگ ئٹی شہید کننگا و اوفتا جون تے خنسگا ہرافتیٹی اسہ اسکول نا استاد ئس ہم اوار اسک۔ ہندُن ہندا سال ئنا جنوری نا تُو ئٹی بیرہ پنجگور ئٹی بیست آن گیشتر جون خسنگا وخت ئس کہ شش تُو ئٹی تیبہ غا چِھل اسکان جون تا خننگ، کیچ آن سی آن زیات، گوادر ئٹی اِرا درزن وخت ئس کہ شال، سبی، و خضدار ئٹی اسہ درزن ئس ہندن تیبہ غا بلوچستان ئٹی بیگواہ غا بندغ آتا جونک خسنگار۔
زوراکی ئٹ بیگواہ کننگوک بندغ آتا دروغ جنگ آتیٹی کھسفِسہ ریاست بلوچ راج ئتون نفرت نا درشانی ئے کرِسہ بلوچ و خلیس نا گواچی کننگ خواہِک تانکہ بلوچ تینا جائز آ آجوئی نا خواہنگ آن دو کشے و پاکستان نا قوضہ ئے منِّے۔ تینا گوئوکا ساخت ئے بچفنگ کن و ناجائز آ قوضہ ئے برجاء تخنگ نا کوشست ئٹی ءِ ریاست ہڑدے نا بنیات آ بلوچ آتے خلِسہ جون تے ویران تیٹی خسِک۔ پاکستانی ریاست بلوچ زنک ایسری ٹی اوار ءِ ہراکہ انتہائی مکارانہ و منظم طریقہ ئٹ کننگ ءِ۔
ایسر ئٹی پارینے کہ پاکستانی ریاست نا بلوچستان ئٹی روان زوراکی، وے عدالت خلنگ و دروغ جنگ آتیٹی خلنگ نا برخلاف بی ایس او آزاد اسہ ہفتہ وارانہ سوشل میڈیا مہم ئسے نا پڑو ئے کیک ہراٹی قوضہ گیر ریاست نا بلوچستان ٹی روان زوراکی و دستاویزی ثبوت و رپورٹ آک شنگ کننگور۔ نن کُل بلوچ سیاسی ادارہ، انسانی حقوق آتا تنظیم و سوشل میڈیا نا کاریم کروک آتیان خواست کینہ کہ کُل اوار مرسہ بلوچستان نا توار جوڑ مریر۔
