کیچ : اِرا دے مُست تجابان ئٹی زوراک آ پاکستانی لشکر نا دُو آن زوراکی ئٹ بیگواہ مروک آ خوانندہ بہار چاکر نا خاوت نا نیمہ آن اِرا دے ءِ سی پیک کسر آ برانز برجاء ءِ ۔
بہار چاکر نا خاوت تون برانزی ئٹی ایب کیب نا بندغ آک بھلو کچ ئسیٹی چُنا و زالبول آتون بشخ ہرفینو ۔
برانز ئٹی زوراکی ئٹ بیگواہ آ بہار نا لُمّہ ہیت کرِسا پارے کہ کنا مار بے گناہءِ او خوانندہ ئسے درو ننکان دو بجہ نا وخت آ پاکستانی لشکر کنا مونا اودے دزگیر کرِسا تینتون درے ۔
او پارے کہ ننا ہند ئنا کُل بندغ آک سرپد ءُ کہ کنا مار خواننگ ئٹی ءِ کنا مار ئے پین ہچ وڑ ئنا کاریم تیتون ہچو کاریم ئس متنے ، نہ ایلو بندغ آتون پکنک آ ہنانے ۔
او پارے کہ ہرا وخت اسکان کنا مار آجو متنے ای ہنداڑے برانز کرسا تولوٹ بش مفروٹ ۔
بہار چاکر نا دزگیر کننگ نا وخت آ زوراک آ پاکستانی لشکر اُرانا زالبول و چُناتے ہم لٹ کُٹ نا گواچی کرے ۔
برانز ئٹی تولوک لُمہ سینا دو خننگ کہ ٹپی ءِ ہرادے پاکستانی لشکر تشدد نا گواچی کرینے و پٹی تفوک ءِ ۔
