بلوچ نیشنل موومنٹ نا چیئرمین ڈاکٹر نسیم بلوچ تینا شنگ کروک درشان ئسیٹی پارینے کہ گوادر ئٹی معمار نو اکیڈمی نا پرنسپل ءُ بلوچ نیشنل موومنٹ نا رہشون رمضان بلوچ نا چُنکا ایلم عبدالحق بلوچ نا منہ تو ئنا زوراکی ئٹ بیگواہی آن گُڈ جون ئے بیٹینو۔
او پارے کہ عبدالحق بلوچ ئے فروری ٹی گوادر آن پاکستانی لشکر دزگیر کننگ آن گُڈ بیگواہ کرینے ۔ درو گوادر نا ہند جیونی ، پانوان آن پین اِرا بندغ تون اوار اونا جون خننگانے۔
ڈاکٹر نسیم بلوچ پارے کہ عبدالحق بلوچ کمپیوٹر سائنس ٹی ماسٹر کرینے۔ او مشکے ٹی چُنا تا خواننگ کن معمار نو اکیڈمی ملاسس، ولے پاکستانی لشکر اونا خواننگ جہہ تے بند کرینے ۔ او داکان گُڈ گوادر ئٹی پدا معمار نو اکیڈمی ئے ملاسس ءُ چُنا تے خوانفِنگ ئٹی مسُنے ۔ فروری ٹی بیگواہ کننگانے ءُ درو اونا جون خننگانے۔
او پارے کہ عبدالحق بلوچ نا بھلا ایلم ، بلوچ نیشنل موومنٹ نا باسک رمضان بلوچ 25 جولائی 2009 آ اوتھل زیرو پوائنٹ آن دزگیری آن گُڈ بیگواہ کننگانے ۔ او اینو اسکان بیگواہ ءِ اونا بارو ئٹ ہچو سرپندی ئس تننگ افس۔
بلوچ نشینل موونٹ نا چیئرمین پارینے کہ عبدالحق بلوچ نا خلنگ ہمو تدینی تیٹی اوار ءِ کہ بلوچستان ئٹی استاد ،دانشور ءُ چاگڑدی باسک آک ٹک کننگ مننگ ئٹی ءُ ۔ داکان مُست گوادر ئٹی زاہد آسکانی خلنگانے۔ داسہ بلوچ پروفیسر غمخوار حیات خلنگانے ۔ دا تدینی تیان ہندا لگِک کہ بلوچستان ئٹی خواننداہ ءُ مخلوق نا خذمت کروک بندغ آک رکھوک افس۔
او پارے کہ بلوچستان ئٹی استاد ، خوننداہ ، وکیل ، حوالکار ڈاکٹر ءُ بندغی حق آتا باسک آک زوراکی ئٹ بیگواہ کننگ آن پد خلنگ مننگ ئٹی ءُ ۔
ڈاکٹر نسیم بلوچ اقوام متحدہ ، بندغی حق آتا تنطیم ءُ ایلو ادارہ آتیان خواست کرینے کہ بلوچستان ئٹی برجاء بندغی حق آتا لتاڑ آ پام ایتر ءُ عبدالحق بلوچ ءُ ایلو بندغ آتا کیس آتا بارو ئٹ دلجمی ئٹ سرسوج کیر۔
