بلوچ نیشنل موومنٹ ( بی این ایم ) نا ترجمان پارٹی باسک محمد رمضان بلوچ نا زوراکی ئٹ بیگواہی نا 16 سال پورو مننگ آ مون تِروک درشان ئٹی پارینے کہ محمد رمضان 25 جولائی 2010 آن پاکستانی فوج ئنا زندان ئٹی ءِ۔ اودے اوتھل زیرو پوائنٹ آن سفر نا وخت آ ہمو وخت دزگیر کننگا کہ او گوادر آ ہننگ ئٹی اَس۔
ترجمان نا پاننگ ءِ کہ محمد رمضان و ایلو بندی تا قربانیک بلوچستان نا آجوئی نا بھلا مسخت نا خاطر ءُ۔ قوضہ کروک فوج زندان تا ذریعت ئٹ اونا فکر و نظریہ ئے ایسر کننگ ئٹی بے سوب مسنے۔ ظلم نا دا دور ختم مننگ ءِ، بلوچستان آجو مرو و جبر ئنا حساب ہر وڑ ئٹ ہلننگ مرو۔
ترجمان درشان ئٹی پارے کہ بلوچ راج تینا زوراکی ئٹ بیگواہ تے ہچ گیرام کننگ کپک۔ نن 16می کرن ئٹی پرتگیزی تا بر خلاف مزاحمت نا چیدہ جوڑ مروک تینا راجی ہیرو حمل جیئند ئے اینو اسکان یاد تخانُن، ساڑی دور ئنا راجی زاندانی تے ہم دیہاڑ ئنا گڑد ئٹی دفن مننگ کن الیپرون۔ دا قربانیک اسہ آجو و بندغی بنداو تے ئٹ محکم بلوچستان ئسینا رکھنگ نا خاطر ننا کسرشونی ئے کرور و ننے دا مارشت ترور کہ ننا مزل انت ءِ، ہندا قربانیک جنز آتے حیات تخرہ و راج آتے رد مننگ آن رکھیرہ۔
