بلوچ رہشون و بی ایل ایف نا سپریم کمانڈر ڈاکٹر اللہ نذر نا شنگ مروکو بیان ئسیٹی پارے کہ بلوچ یکجہتی کمیٹی نا اولی لڑ ئنا کسرشون ڈاکٹر ماہ رنگ بلوچ، شاہ جی صبغت اللہ بلوچ و بلوچ اسٹوڈنٹس آرگنائزیشن (BSO) نا فکری کسرشون آتے منوک قانودی معیار و اصول آتا برخلاف اسہ فیس لیس (faceless) ٹرائل نا پرچار ئے کرسہ سخت انگا دوبہ غاتا کمک ئٹ قید و بند و عمر بندی نا سزا بنفگ، اصل ئٹ پاکستانی زوراک ئنا سیاسی دیوالیہ پن، فاشسٹ آ مون آتا و نوآبادیاتی ذہن آتا اعتراف ءِ۔ دا بیر ہلنگ و ظالمانہ فیصلہ ننا دا مُتکُن انگا و اصولی سیاسی موقف ئٹ مہرِ تصدیق ثبت کیک کہ دا غیر فطری ریاست نا مچ تھمبہ آک بیشک او عدلیہ مرے، قانود جوڑ کروکا یا انتظامیہ، مچ آک پردہ نا پد آن لشکری اشرافیہ نا فیس لیس قوت آتا اشارہ غاتے ئٹ چلننگرہ۔
رہشون پارے کہ ہرا عناصر آک داسہ ہم دا استعماری ڈھانچہ نا تہہ ٹی سلِسہ نقلی جمہوریت، بندی عدلیہ و بے عزت آئین نا نعرہ غاتے خَلیرہ، پُرامن السی و خوانندہ کسرشون آتے تروکا دا ساڑی سزا تے اوفتا فکری دیوالیہ پن، سیاسی خوش فہمی و سیاسی کھور مننگ ئے مر کننگ نا خاطر بیرہ کافی مروئی ءِ۔ پاکستان ہچو آئینی ریاست ئس اف، و دانا با اختیار ادارہ منہ لشکری زوراک ئٹ قوضہ کروک اسہ مافیا ئس ءِ، ہراکہ محکوم و مظلوم راج آتا توار ئے حق ئے توننگ ئنا خاطر آن زر ہلوک سیاسی فائدہ نا خاطر ستعمال کروکاک، پارلیمانی دوکاندار آتا و ضمیر بہا کروک کرایہ نا جج آتے بطور سلاہ استعمال کننگ ءُ۔
سپریم کمانڈر نا رد ئٹ اسہ کنڈ آن قوضہ کروک پاکستانی فوج ہردے نا بنداو ئٹ بلوچ ورنا تے، دانشور آتے و سیاسی کارکن آتے زوراکی وڑ ئٹ بیگواہ کننگ تون مسخ مروکا جون آتے بِٹنگ ءِ، و ایلو کنڈ آن ہراکہ سیاسی و انسانی حق آتا کسرشون ئے قید و بند ئٹ ٹِک جوڑ کیرہ۔ دا منظم بلوچ نسل کشی و حق آتا پامالی ئٹ پارلیمان ئٹی زنڈوک نام نہاد سیاسی ایجنٹ آتا چپی و مصلحت پسندی دا ثابت کیک کہ او دا دیہاڑی زوراکی ئٹ قوضہ کروک ریاست ئنا سہولت کار و برابر ئنا بشخ دار ءُ۔
او پارے کہ بلوچ یکجہتی کمیٹی مدام پُرامن، السی و سیاسی گڑد آتیٹی مننگ، مچ آ ریاستی اڑی تے و پروپیگنڈا نا باوجود، دا ظالمہ نظام ئنا اصل دروشم ئے دنیا نا مون ئٹ بے نقاب کرینے۔ ولے اسہ ظالم و فاشسٹ ریاست ئنا خاطر مظلوم آتا دا پُرامن فکری و سیاسی جدوجہد ہم ناقابل برداشت مسنے۔ داسہ سوج دا ودی مریک کہ انت داسہ ہم ہچو باشعور و باضمیر بلوچ دا غلط فہمی تیٹی اڈ کننگ کیک کہ ریاست پاکستان اسہ خونخوار او جلاد ئسے آن بغیر پین ہچ ئس اف؟ انت دا حقیقت دے ئنا روشنی نا وڑ ظاہر اف کہ دا فیس لیس مخلوق کٹھ پُتلی حکمران آتے بیرہ منہ ٹکر آتا تبادلہ ئٹ ہڑدے ناچ کرفِک؟
بلوچ رہشون بیان ئٹی پارے لشکری اشارہ ئٹ کروکا عدلیہ نا دا ساڑی فیصلہ نا حمایت و تعریف بیرہ دا عناصر آتا کنڈ آن مون آ بسنے ہرافتا تینا دامن بلوچ الس ئنا دتر آن داغدار ءِ۔ دافتیٹی اسہ کنڈ آن بلوچستان نا کٹھ پُتلی وزیر اعلی اوار ءِ ہراکہ سوئی، ڈیرہ بگٹی و مچھ ئٹی ریاستی حمایت ئٹی چلنگوکا بدنام زمانہ ڈیتھ اسکواڈز ئنا بھلا ءِ، تو ایلو پلو آن او مسکوئی نگران کارندہ غاک ءُ ہرافتہ سیاسی و اخلاقی زوال نا دا کچ ءِ کہ او تینا لشکری آقا تے خوش کننگ نا خاطر پریس کانفرنس آتیٹی تینا لمہ آتا بے عزتی ئٹ ہم مزاحمت ئنا حق آن پد مننگ ئے ریاست آن تینا وفاداری نا معیار پوہ مریرہ۔
بلوچ رہشون پارے کہ دافتہ وڑ ئنا بے ضمیر، زر ہلوک و موقع دوست آک ایلو تا دو ئٹ چلینگوکاک زوراکی ئٹ قوضہ کروک فوج ئنا چکری، بوٹ چٹنگ و تابعداری کننگ اوفتا اسٹ انگا ذریعہ معاش و سیاسی بقا ءِ۔ ولے دیہاڑ گواہ ءِ کہ شعور آن پُر بلوچ راج ئے برطانوی استعمار آن ہلیس ساڑی آ لشکری قوضہ کروک ئنا اولی دے آن دا نوآبادیاتی فرمان ہرفنگ و زوراکی ئٹ الحاق ئے مکمل وڑ ئٹ قبول کتنو۔
سپریم کمانڈر نا رد ئٹ ریاست یات تخے کہ پِرکوت، زندان، فیس لیس ٹرائل و پاہو تیان ہچ راج آتا نظریاتی و سیاسی سفر ئے تورنگ کننگ کپک۔ بلوچ راج اینو تینا حق آتا، تینا ڈغار و تینا وجود نا بقا ئنا خاطر ہر میدان ئٹ سینہ مون ئٹ ءِ۔ لمہ غاتا، ایڑ تا و ورنا تا دا لازوال قربانیک، مرغن فکری و سیاسی مزاحمت و دا صبر آزمائیفوک دیہاڑی جدوجہد دا ہیت ئنا ظاہر درشان ءِ کہ داسہ ہچو مصلحت، ہچو کٹھ پُتلی حکومت و ہچو جبری ءُ فیصلہ ننے پدی کننگ کپک۔
بیان نا ایسر ئٹ پارے کہ ننا مزل نہ دا ربڑ اسٹیمپ پارلیمان ءِ۔ نہ دا نوآبادیاتی آئین و نہ تو دا پابند عدلیہ آن انصاف، ننا مزل بیرہ و بیرہ اسہ آجو، تینٹ خواجہ و زور ئٹ قوضہ کروک حق آتیان پاک بلوچستان ءِ، و نن دادے حاصل کرونک۔
