بلوچ آجوئی دوست راجی کسرشون و بلوچستان لبریشن فرنٹ (بی ایل ایف) نا سپریم کمانڈر ڈاکٹر اللہ نذر بلوچ تینا اسہ درشان ئسیٹی پارینے کہ اگہ کشمیری و پشتون مزاحمت بلوچ راجی جدوجہد تون اوار مریر تو دیہاڑ نا رُخ بدل مننگ کیک۔
دا درشان بی ایل ایف نا آفیشل میڈیا چینل "آشوب” آ شنگ مسنے۔
تینا درشان ئٹی بلوچ کسرشون پارینے کہ پنجابی ریاست تینا قدرتی عمر نا گڈی موڑ آ سر مسنے، و او دے مُر اف ہراتم پنجاب اسہ لینڈ لاک علاقہ ئسینا دروشم ئے اختیار کرو۔ ای بلوچ راجی سپاہی ئسینا بستار ئٹ، مزاحمت نا میدان ئٹ، کشمیری و پشتون آتے بلوچ راج نا کنڈ آن اُست ئنا حُب و گرم جوشی تون اوار بخیر ئٹ کننگ کن تیار اُٹ۔
او نا پاننگ اَس کہ اینو اگہ کشمیری و پشتون راج آک دیہاڑ نا دا اہم و فیصلہ ہرفننگ نا موڑ ئٹ مونی برسہ بلوچ راجی جنز نا ہمراہ مننگ نا فیصلہ ئے کیرہ تو نن دہک آتا مُری ئے سال آتیٹی ایسر کننگ کینہ۔ اگہ پنجابی استعماریت نا زوراکی نا گواچی مروک آ راج آک دا دیہاڑی فیصلہ ئے کیرہ تو او پاکستان دنکہ ہفتاد سال آن بلوچ، سندھی، پشتون و کشمیری راج آتا بر خلاف زوراکی، لُٹ ءُ پُل و جنگی ڈوھ تا مرتکب مرسٹ بسُنے، مُچ مرسہ اسہ لینڈ لاک ءُ پنجاپ ئسے اسکان محدود مرو۔
او پارے کہ اینو دیہاڑ کوکار کرسہ ننے توار کننگ ءِ کہ مظلوم راج آک تینا بروکاتم نا فیصلہ ئے تینٹ کیر۔ اگہ پشتون و کشمیری الس مزاحمت و آجوئی نا کسر ئے اختیار کننگ نا دیہاڑی فیصلہ ئے کریر تو او تینے تنیا آخہ بلکن سیاسی، سفارتکاری و مزاحمت تون اوار ہر میدان ئٹ بلوچ نا وڑ انگا کوپہ ئے تینا کوپہ بہ کوپہ خنور۔ ای دیہاڑ نا روشنی ٹی پہہ مریوہ کہ بھاز آ راج آتا مزاحمت و آجوئی نا جنز آک اوار دشمن نا بر خلاف اوار مریرہ تو او دیہاڑ نا رخ ئے بدل کیرہ۔
اونا پاننگ اَس کہ پاکستان تینا وجود ئٹی اسہ عسکری، قوضہ کروک و مظلوم راج آتا گل زمین تیا جوڑ اسہ توسیع پسند ریاست ئس ءِ۔ پاکستانی ریاستی جوڑشت دیہاڑ نا دروشم ئٹ اسہ گندہ ءُ داغ و تضاد آتا مُچی ئس ءِ، و دن انگا ریاست آتا شکست و ریخت نا بِج اوفتا وجود ئٹی ڈھکوک ءِ، و دن انگا ریاست آک مظلوم راج آتا شعور و راجی مزاحمت نا سوب آن تینا انجام ئے سر مریرہ و پاکستان اینو ہندا انجام نا خڑک سر مسنے۔
ڈاکٹر اللہ نذر بلوچ پارے کہ بلوچ، پشتون و سندھی راجی تضاد آتا بش مننگ و جنز آتا درشم ئٹی مونا بننگ آن پد کشمیری تضاد یا غلامی ظاہر مسنے، ہفتاد سالی آ خوش نظر بروکا نعرہ غاک، خوش نظر بروکا ریاستی بیانیہ آن پد اینو روشن انگا دے ئنا وڑ ظاہر مسنے کہ کشمیر پاکستان نا کالونی ئس ءِ۔ راست انگا ہیت داد ءِ کہ پنجابی استعمار نا کل چال آتا باوجود کشمیری داسہ مزاحمت نا کسر ئٹ ہننگ ءُ۔ اینو کشمیری ورنا، کشمیری دانشور بھاز کڑمبی ئٹ پُہہ مسنو کہ کشمیر تون پاکستان نا سیالی پنچ دریاب آتیٹی دیر ئنا وہنگ و کشمیر نا برز و بالا مش تا ہندوستان نا بر خلاف قدرتی دفاعی سنگر آن بیدس پاکستان نا خن ئٹی کشمیری تا ہچو بستار و مرتبہ ئس اف۔
بلوچ کسرشون پارے کہ دہک آتیان پد سہی ولے اینو کشمیری شعور پاکستان نا مکر و چم و خوش نظر بروکا نعرہ غاتا پڑدہ ئے پاش کرسہ تینا دیہاڑ و حقیقت ئے حقائق نا روشنی ٹی تینا راجی سوج ئنا دارہ ایرہ ئٹ جمع مسنو۔ دا نہ بیرہ کشمیری تا بقا و نجات نا وسیلہ ئس جوڑ مسنے بلکن پاکستانی زوراکی نا بر خلاف ایلو مظلوم آتا سنگر نا اہم ءُ کوپہ ئس جوڑ مننگ کیک۔ کشمیریک تینا راجی بقا نا خاطر فیصلہ نا پورو اختیار تخرہ ولے وخت بسنے کہ غیرت مند کشمیریک راست گام ہرفر پاکستان آن نجات نا خاطر آن آجوئی نا کسر ئٹ کار۔
او نا رد ئٹ کشمیری جدوجہد پاکستان نا ہارڈ اسٹیٹ نعرہ غاتا راز ئے پاش کرے۔ دا پالیسی بلوچ راجی جنز ئے ختم کننگ نا خاطر آن کاریم ئٹ ہتنگ کن جوڑ مسس ، ولے او کشمیر ہرادے ہفتاد و ہفت سال آن پاکستان تینا بھلا رغ پاریکہ اینو پاکستان اودے دشمن پائک، و او نا ہارڈ اسٹیٹ بیانیہ نا نشانہ آٹ ءِ۔ کشمیری تیتون دشمن نا وڑ سلوک آن پد ہرا مظلوم نا پاکستان نا باب ئٹی خوش فہمی حقیقت ئٹ تینا راجی موت ئے بغل کننگ نا بریبر ءِ۔ بنداوی وڑ ئٹ ہارڈ اسٹیٹ نا اصطلاح نا استمال تینٹ دا راز آتے پاش کیک کہ پاکستان زوراکی و طاقت ئٹ مظلوم راج آتا راجی گل زمین تے آ جوڑ ءِ۔ اینو پاکستان ہارڈ اسٹیٹ وڑ نا اصطلاح تے راج آتے بھیم زدہ کننگ نا خاطر آن استمال کننگ ءِ۔
او پارے کہ بلوچ، سندھی و پشتون مزاحمت آن پد کشمیری تا مزاحمت ئے ہُرن گُڑا "ہارڈ اسٹیٹ” نا اصطلاح نا کارمرز بنیاتی رد ئٹ پاکستان نا اعتراف ءِ کہ داسا نا ساڑی آ ڈھانچہ تون پاکستان نا بقا ناممکن ءِ و بلوچ راجی مزاحمت تینا مسخت نا ہلنگ نا خُڑک بسُنے و ہندا پاکستان نا بے سوبی نا اولی اعلان نامہ ءِ۔
درشان ئٹی پاننگا کہ ہارڈ اسٹیٹ نا اصطلاح نا کارمرز تنیا اسہ سیاسی و عکسری نعرہ ئس اف بلکن مظلوم انگا راج آتا نسل کشی و اوفتون زوراکی تا ریاستی عمل ئنا عکاسی ءِ۔ اینو پاکستان نا نیمہ غان ہارڈ اسٹیٹ نا بیانیہ دا حقیقت نا اعتراف ءِ کہ بلوچ راجی جنگ آجوئی اسہ پوسکنو مرحلہ سیٹی بسنے، ہراٹی بلوچ سرزمین نا آجوئی نا نشانیک پاش ءُ۔
بلوچ رہشون پارے کہ راجی تضاد آتا منطقی ایسر آن بے خبر پاکستانی مذہبی پوشاک ئٹی ہرا فوجی ریاست ئس جوڑ مسنے ولے اوکان پد ہم پاکستان نا سربر آک ہندا پہہ مریرہ کہ داسا نا فوجی جبر و مظلوم آتا نسل کشی کم ءِ۔ ہندا سوب ءِ کہ کوزہ کروک آ ریاست ہارڈ اسٹیٹ بیانیہ آ زور تِرسہ تینا زوراکی تے گیشتر کننگ نا پاننگ ءِ ولے پاکستان نا سربر آک و فوج دا پہہ مننگ اف کہ تضاد و اوفتا گیشیفنگ آن نرنگ و عسکری قوت ئٹ راجی تحریک آتے ختم کننگ نا حکمت عملی دا ریاست نا وجود و بنیات آتے سُریفینے۔
