بی آر جی نا ترجمان سرباز بلوچ میڈیا ٹی شنگ کروک بیان ئسیٹی پارے کہ ننا سرمچار آک اِستو سندھ ئنا ہند کشور ڈیرہ موڑ چوک آ سلوک لُٹ ءُ پل کروک آ کمپنی نا ٹرالر لاری، مشینری و کاریم کروکا بندغ آتے آ بھلا سلاہ تے ئٹ جلہو کریر، کاریم کروک و پولیس نا بھاز کارندہ غاک ٹپی مسر و مشینری تے ہم نسخان رسینگا-
ترجمان مُستی پارے کہ اینو سوب ئنا ہمو ہند آ او جی ڈی سی ایل نا کاروان ئے ڈیرہ موڑ نا خڑک ریموٹ کنٹرول بمب جلہو ئٹی نشانہ کننگا ہرا وخت او ڈیرہ بگٹی نا نیمہ غا ہننگ ئٹی اس۔
ترجمان مُستی پارے کہ او جی ڈی سی ایل بلوچستان نا ہند ڈیرہ بگٹی ٹی بلوچ راجی مڈی تا لُٹنگ کن جتا ہند آتے آ سروے تا بناء ئے کرینے ہرافتے ہچ وڑ ئٹ اجازت تننگ مفک۔
مُستی پارے کہ بی آر اے دا لٹ ءُ پُل کروک آ کمپنی تے خبڑدار کیک کہ ڈیرہ بگٹی ٹی تینا کُل کاریم تے زوت بند کیر و دا ہند آن پیشتمر اگہ نہ تینا نسخان نا ذمہ وار تینٹ مرور انتئے کہ راجی مڈی تا رکھینگ کن تنظیم تینا کاروائی تے تیز کرو۔
بیان نا ایسر ئٹ پاننگا کہ یانزدہ جون آ قلات نا ہند نرمک ئٹی بی آر اے نا سرمچار آک مصطفٰی ولد باہر کلوہی رند ئے سُم سمُکاری کرسا خلکُر۔ دا بندغ ئے منہ وخت مُست سرمچار آک دزگیر کریسُر دزگیری نا وخت او کوزہ گیرہ لشکر تون کمک، لشکر کشی تیٹی اواری ئے مناسس۔ اکتوبر 2016 ٹی تنظیم نا کیمپ آ فوج ئنا نیمہ آن جلہو کننگاسس ہراٹی مصطفیٰ تُد مسُنے، ہندا لشکر کشی ٹی پاکستانی فوج مبارک ولد جانا بگٹی ئے شہید کرسا زالبول و چُنا تیون اوار کیہی بندغ آتے زوراکی ئٹ بیگواہ کریسس۔
