بلوچ رہشون و بی ایل ایف نا سپریم کمانڈر ڈاکٹر اللہ نذر نا بیان بی ایل ایف نا چاگڑدی میڈیا آشوب آن شنگ کننگانے ہراٹی اونا پاننگے کہ تینا بنداوی حق آتا و آجوئی نا خاطر بنچاپی قوضہ نا بر خلاف کشمیری اُلس ئنا مزاحمت دا راستی ئے پاش کننگ نا درشانی ءِ کہ مظلوم قوم آتے طاقت نا زور ئٹ شکست تِننگ مفک۔
کشمیری و ایلو مظلوم قوم آتا زی آ زور ئٹ فیصلہ مسلّط کننگ داسہ اسلام آباد کِن ممکن اف۔ پاکستان نا قوضہ کروک آ "آزاد کشمیر” بیرہ پِن ئنا کچ اسکان آزاد ءِ۔ ولہ راستی داد ءِ کہ کشمیر ئٹی پنجاپ نا عمل داری و حاکمیت جوڑ ءِ۔ فیڈریشن نا پِن ئٹ پنجاپ نا حاکمیت مظلوم قوم آتا زی آ قوضہ ءِ و کشمیر نا فیصلہ ئے کشمیری تا جاگہ غا اسلام آباد ئٹی تولوک آ سیکرٹری لیول نا افسر آک کننگ ءُ۔
بلوچ رہشون پارے کہ کشمیری تے آ ظلم و زوراکی و اوفتا لس کھسفنگ غیر فطری آ ریاست نا بر خلاف خُلیس نا درشانی ءِ انتئے کہ مظلوم قوم آتیا ہُرے اسکان زوراکی ئٹ حکمرانی کننگ داسہ ممکن اف۔ پنجاپ نا حاکمیت نا بر خلاف جدو جہد مظلوم قوم آتا حق ءِ و نن اوفتا حق حاکمیت و آجوئی نا جہدوجہد نا مُخ تفی ئے کینہ۔
ڈاکٹر اللہ نذر نا بیان نا ایسر ئٹ پاننگاسس کہ پاکستانی قوضہ نا بر خلاف مظلوم قوم آک بش مننگ ئٹ ہخس ہُرے کرور، اوفتے ہموخس زیات نسخان ہرفوئی تمو۔ آجوئی نا خاطر جہدوجہد مظلوم قوم آتا فرض ءِ و نن کشمیری پشتون و سندھی تا جدوجہد آزادی نا اخلاقی و سیاسی وڑ ئٹ مُخ تفی ئے کینہ۔ مظلوم قوم آک آجوئی نا جدوجہد ٹی بلوچ آتے تینا سنگت سمجھِر، و بلوچ قوم ہم امیت تِخک کہ ایلو مظلوم قوم آک بلوچستان نا آجوئی نا جدوجہد نا مُخ تفی آن تینے پدی توروفَس۔
