بلوچ نیشنل موومنٹ نا بندغی حق آتا ادارہ پانک تینا شنگ کروک بیان ئسیٹی پارینے کہ آواران نا ہند گیشکور نا جہی و اسکول نا استاد ایاز بلوچ نا بے گناہ آن کھسفنگ ئے بھاز شیف خلینہ۔
او پارے کہ 16 اکتوبر 2025 آ ایاز بلوچ ولد دوست محمد ئے اونا ماما نا مار امداد بلوچ تون اواری ئٹ اُراغان پاکستانی لشکر دزگیر کرسہ بیگواہ کریسس۔ اونا زوراکی ئٹ بیگواہی آن پد خاہوت اونا سوج ئے کریسس ولے سرکار نا نیمہ غان ہچو حوال ئس رسینگتوسس۔
پانک ئنا پاننگ ءِ کہ 6 جنوری 2026 آ آواران نا ہند نوندڑو ئٹی ایاز بلوچ نا سُم خلوک جون دُو تمانے، اودے جیل ئٹی غیر قانودی وڑ ئٹ کھسفنگانے، اونا ماما نا مار امداد بلوچ داسکان بیگواہ ءِ ۔
او پارے کہ دا کوش بلوچستان نا استاد و لس شاری تا برخلاف ٹک کننگ نا بخش ئسے ۔ ایاز بلوچ نا ماما خدا بخش او ہم اسکول نا استاد مسُنے ہرا 3 مارچ 2024 آ غیر قانودی وڑ ئٹ کھسفنگانے و اونا جشوک آ جون خضدار نا ہسپتال آن خننگانے۔
او پارے کہ پانک ایاز بلوچ نا زوراکی ئٹ بیگواہی آن پد کھسفنگ نا ذمہ وار پاکستانی لشکر ئے پائک ۔ دا وڑ انگا گام آک جہانی بندغی حق آتا قانود نا برخلاف ءُ۔
