بلوچ یکجہتی کمیٹی نا راہشون سمی دین بلوچ تینا شنگ کروک بیان ئسیٹی پارے کہ ماہ زیب چُنکی آن مزاہمت کرینے ۔ ہنوکا ہفت سال ئٹ او تینا ماما راشد حسین نا آجوئی کن اونا فوٹو تے ہرفسہ شال ، کراچی و اسلام آباد نا روڈ آتیا یکو برانز کننگ ءِ ،اونا ہندا اسہ سوج ءِ کہ راشد حسین زندہ ءِ یا آخہ، اگہ زندہ ءِ گُڑا ارانگ ءِ ۔
او پارے کہ دا سوج ئنا جواب ہر وخت زوراکی ئٹ تِننگانے۔ دا سوج ئنا جواب کن او ہر وڑ نا زوراکی تیتو مون تسُنے ۔ کوئٹہ پریس کلب نا مونا برانز کننگ نا وخت اودے دھمکی تننگ مسُنے ۔ اسلام آباد نا برف تفوک آ یخ ئٹی زندان تیٹی بند کننگ مسنے ۔ کراچی نا سڑک آتا زی آ گِر کننگانے ۔ ریاست نا کُل زوراکی تان بیدس ماہ زیب چُپ متو و پدی متو ۔
سمی دین پارے کہ اینو پدا ہندا توار نا چُپ کننگ کن اسہ پین چم ئسے ئٹ ریاست اونا باوہ ئے زوراکی ئٹ بیگواہ کرے۔
