بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک تینا بیان ئسیٹی پارے کہ ننا سرمچار آک 12 دسمبر دے ئنا 12:00 بجہ غا آواران شار ئٹی آرمی نا بریگیڈ ہیڈکوارٹر و بھلا کیمپ ئے ٹک کریر ۔ سرمچار آک کیہی مارٹر گولہ خلکُر ہرافک بھلا کیمپ و ہیڈکوارٹر نا تہٹی تمار ۔ کوزہ کروک فوج خُلیس نا گواچی مرسہ آواران شار آن خُڑک اُراتیا کیہی ماٹر گولہ خلک ہرافک اُراتیا تمار ۔
کوزہ کروک لشکر نا بھلا کیمپ ئنا مونا لشکر نا بھلنی ٹی ایف سی پبلک اسکول نا پن آ اسہ تعلیمی ادارہ ئس جوڑ ءِ اسہ ماٹر ئس ہمو ایف سی پبلک اسکول آ تما ۔ بلوچستان لبریشن فرنٹ میڈیا نا ذریعت ئٹ خوانندہ تا باوہ غاتے پائک کہ دا اسکول اسہ تعلیمی ادارہ ئسے آن زیات فوجی تربیتی مرکز ئسے ۔ ہراڑے نوآبادیاتی تعلیم تون اوار خوانندہ تے بلوچ تاریخ، ثقافت و مزاحمتی ادب آن مُر کننگ ءُ ۔ دا بیرہ پِن ئنا اسکول بروکا وخت ئٹ بلوچ خوانندہ تے باقاعدہ وڑ ئٹ فوجی ادارہ تیٹی بھرتی کننگ نا اسہ سوگو او چَم ئسے۔
بی ایل ایف بلوچ خوانندہ تا باوہ تیان خواست کیک کہ دا سازشی منصوبہ ئے تُرندی ئٹ پہہ مریر انتئے کہ دا بلوچ قومی بقا تون تفوک جیڑہ ئسے۔ مُستی دا ہم واضح کینہ کہ بھلا کاروائی تا وخت آ فوجی کیمپ آتیان خُڑک چُنا تے نسخان رسینگ نا گمان مریک ۔ دا نازرک آ حالیت ئے پہہ مرسہ بلوچ باوہ غاک تینا چُناتے دا وڑنگا عسکری ادارہ تیان مُر کیر ۔
ترجمان پارے کہ ملخدو نا اسہ پین کاروائی سیٹی ویگ ئنا 7:00 بجہ آ سرمچار آک آواران نا ہند کنیرہ ٹی پاکستانی لشکر نا کیمپ آ بھاز خُڑک آن جلہو کریر ۔
جلہو آن مُست راکٹ لانچر تیٹ کیمپ ئے نشانہ کننگا۔ اسہ راکٹ ئس فوج ئنا رکھوک آ چوکی آ تما ہرانا سوب آن اِرا کارندہ خلنگار۔ پدا سرمچار آک ایل ایم جی و اسنائپر رائفل نا ذریعت ئٹ کیمپ ئے نشانہ کریر۔
ترجمان پارے کہ ڈھکوک حوال تا بنیات آ سرمچار آک اسہ پین کاروائی ئس کرسا دے ئنا یک بجہ غا تربت نا علاقہ آپسر ریسرچ فارم آ رحمدل ولد فضل ئے سُمکاری کرسا خلکُر۔ پن کروک بندغ تربت نا علاقہ ڈکی بازار نا ہندی ئس اسک ہرا فوج ئنا اہم او کارندہ ئس اسک۔ رحمدل داکان مُست زلخان تون کاریم کریکہ و زلخان نا خلنگ آن پد او ایم آئی نا کارندہ نصیر تون تُد اسک۔ نصیر نا خلنگ آن پد او تربت ئٹی برجاء انگا ایم آئی نا دفتر تون تفوک اسک۔
ترجمان مُستی پارے کہ رحمدل بلوچ راجی تحریک آجوئی نا برخلاف کاریم کننگ اسک و تربت شہر ئنا جتا علاقہ تیٹ بلوچ ورناتے زوراکی ئٹ بیگواہ، کوزہ گیر فوج ئنا بھلنی ٹی جتا چاگڑدی خرابی تیٹی تُد اسک۔
ترجمان گہرام بلوچ ایسر ئٹ پارے کہ آواران و تربت جلہو تیٹی کوزہ کروک فوجی کارندہ و ایم آئی کارندہ نا خلنگ نا ذمہ واری ئے ہرفسا دا قول ئے کینہ کہ کوزہ گیر فوج و اونا کمک کروک آتے بلوچستان نا ہر کنڈ ئٹی نشانہ کرون۔
