بلوچستان نا ضلع خضدار نا تحصیل وڈھ ئٹی بیگواہ کننگوک عبدالباری شیخ ولد عبدالخالق شیخ نا آجوئی کن سوب ئنا بھلا کسر آ برانز کننگا ہرانا سوب آن کوئٹہ کراچی کسر ئے مُچّا بند کننگانے۔
درو انتظامیہ و ہندی معتبر آتا نیام ئٹ مذاکرات آن پد پڑو کننگا کہ جمعہ نا دے کسر بند کننگ مفرو۔ واہم خاہوت و ہندی بندغ آتا پاننگ ءِ کہ انتظامیہ نا یخین تِننگ آن پد ہم عبدالباری نا آجوئی کن ہچو گامگیج ئس ہرفنگ متنے ہرانا سوب آن اوفک برانز کرسا کسر ئے تفینو۔
کسر نا بند مننگ نا سوب آن مسافر کوچ و لاری تا بھلو قطار ئس سلیسونے۔
برانزی تا پاننگ ءِ کہ اوفک کیہی دے آن انتظامیہ تون حوال ئٹی ءُ ولے ہر وار بس زبانی یخین تِننگِانے۔ خاہوت نا رد ئٹ جمعہ نا دے پاننگاسس کہ اگہ شام اسکان عبدالباری ئے آجو کننگ متو گُڑا ہفتہ آن بھلا کسر ئے بند کننگ مرو و اینو اوفک تینا پڑو آ عمل کن بیوس مسُنو۔
برانزیک خواست کرینو کہ عبدالباری شیخ ئے زوت آجو کننگ کن جوانو و عملی گامگیج ہرفنگ مرے، اگہ نہ تو برانز برجاء مرو۔
