بلوچ اسٹوڈنٹس ایکشن کمیٹی( بساک) تینا شنگ کروک بیان ئٹی بی ایم سی ٹی خوانندہ تے خُلیفنگ آ افسوس نا درشانی ئے کرے و پارے کہ دا روشت بلوچ دودمان تہ لتاڑ ءِ، نن تنیا دادے شیف خلپنہ بلکن دُن انگا تدینی تے تروندی ئٹ رد کینہ و زوت دا ڈوھ تیتون اوار بندغ آتا برخلاف کاروائی نا خواست کینہ۔
او پارے کہ بلوچستان ئٹی خواننگ نا ادارہ آک جتا انگا بندغ آتا دوٹی ءُ ہراڑے خوانندہ تا زندگیگ ہڑدے جنجال آتا گواچی ءُ۔ ہڑدے خواننگ نا ادارہ تیٹی وے بندغی او تدینی مننگ ءِ خوانندہ آتا خُلیفنگ تون اوار جتا وڑ ئٹ خواننگ نا جیڑہ ودی مننگ ءِ۔ دا وڑ انگا تدینیک داسا ہڑدے ئی دود ئس مسُنے۔ داڑے خوانندہ تے امتحان تا وخت خُلیفنگ مریک کہ نُمے فیل کرون۔ خواننگ نا ادارہ آک زوراکی نا کیمپ جوڑ کننگانو۔
ترجمان پارے کہ نن ہندا پہہ مرینہ کہ دُن انگا تدینیک ننا دودمان کن ہندنو نشان ئسے کہ اودے گوہنگ کن بھاز وخت بکار ءِ۔ سرکار ہر وخت اسہ سرسوج کروکو ٹیم ئس جوڑ کیک ہرا خوانندہ تے ریفیسا بے توار کیرہ ولے منہ وخت آن پد اوکان خراب ءُ تدینی مونا بریک۔
او پارے کہ نن دُن انگا بے دود انگا عمل تے ترندی ئٹ شیف خلینہ و کُل زوراکی نا گواچی مروک خوانندہ تیتون اوار اُن و سرکار آن خواست کینہ کہ دُن انگا تدینی تیٹی اوار کُل بندغ آتے مونی ہتِسا سزا تننگ مرے۔
