بساک نا نیمہ غان چارمی مرکزی کونسل سیشن نا وخت آ کوئٹہ پریس کلب ئٹی اڈ ہلوکا پریس کانفرنس ئے پولیس تورے۔
تنظیم نا رد ئٹ وختس اوفتا قیادت پریس کلب آ سر مس گُڑا اوڑے پولیس نا بھلو کچ ئس مُست ساڑی اسک ہرافک پریس کلب ئے سیل کریسُر و تنظیم نا سربر تے پریس کانفرنس کننگ آن توریر۔
پولیس کالخواہ تا رد ئٹ سیکیورٹی حالیت نا سوب آن ہچو سرگرمی ئسینا جازت تننگ متنے۔ ڈی ایس پی پارے کہ ڈپٹی کمشنر آن این او سی ہلنگ آن بیدس پریس کانفرنس نا اجازت تننگ مفک و مزاحمت کننگ آ دزگیر کننگ مرور۔
بساک نا مرکزی ترجمان پارے کہ پریس کانفرنس نہ اُلسی مُچی سے نہ پین قانودی دفعہ سینا برخلافی نا بشخ ئٹی بریک۔ اونا رد ئٹ پریس کلب نا اجازت آن پد ہم پولیس نا نیمہ غان سیکیورٹی نا پن آ پریس کانفرنس ئے توننگ رائے نا درشانی آ رکھ خلنگ ءِ۔
ترجمان پارے کہ دنیا ٹی ہچ جاگہ ئسے آ پریس کلب آتا رکھ خلنگ مفک ولے داڑے پریس آزاتی آ دُن انگا روشت بھاز درڑدی او عمل ئسے۔
او پارے کہ تنظیم تینا پریس کانفرس ئے عارضی وڑ ئٹ پد بٹینے و دادے منہ دے آن پد کننگ مرو۔
مرکزی ترجمان حکومت بلوچستان و ضلعی انتظامیہ آن خواست کرینے کہ پریس نا آزاتی، خوانندہ تنظیم آتا جمہوری حق و رائے نا درشانی نا آئینی حق ئے یخینی جوڑ کننگ مرے۔
