ماحولیاتی بدلی تا رد ئٹ کاریم کروکا باسک زنیرہ بلوچ پارینے کہ حب ئٹی اونا اُراغا نادُرست بندغ آک جلہو کرسا قیمتی کاغد و ایوارڈ آتے نسخان تسنو۔ زنیرہ بلوچ دا وخت آ تینا تاتہ نا برام کن خضدار ئٹی ءِ۔
زنیرہ بلوچ یک شمبے نا شام تینا انسٹاگرام اسٹوری ٹی تدینی نا حوال تے شنگ کرسا پارے کہ اونا وے ساڑی مننگ آ نادرُست بندغ آک اونا اُراغا جلہو کرسا پاسپورٹ، یونیسف نا سرکاری کاغد، شیلڈز و ٹرافی تے پرغسا ہنانو۔ اونا پاننگ اسک کہ او ہر وخت چاگڑدی دیمروی و ماحول نا جوانی کن کاریم کرینے۔ دا دڑد تِروکو تدینی ئسے کہ کنا کاریم نا برخلاف دُن سوگو چم بازی نا رد ئٹ کاروائی کننگانے۔
اونا پاننگ اسک کہ دا تدینی آن پد ہم اونا حوصلہ پنتنے بلکہ او پین سوگوی ئٹ تینا جہد ئے برجاء تخو و ہچ وخت اُلس و چاگڑد نا خزمت آن مُر مفرو۔
دا اولی تدینی اف کہ زنیرہ بلوچ ئے تڑی تننگانے یا سختی مون تروئی تمانے۔ یاتی مرے کہ زنیرہ نا باوہ ئے زوراکی ئٹ بیگواہی آن پد کہسفنگاسس۔
عبدالقیوم زہری ہرادے نومبر 2020 ئٹی حب آن پاکستانی ایف سی نا کارندہ آک زوراکی ئٹ بیگواہ کریسُر۔ اِرا سال آن پد سی ٹی ڈی دروغ ئنا مقابلہ ٹی اودے مُسہ بندغ تون خلکس۔ اول اونا جون ئے لاوارث پارسا کوئٹہ نا تیرا میل قبرستان ئٹی دفن کننگاسس واہم اِرا سال آن پد خاہوت ئے دا تدینی نا حوال مسس اوکان پد اوفک پدا قبر ئے پٹار۔
