بلوچستان نا ضلع مستونگ آن برمتہ کننگوک ڈی ایس پی محمد یوسف ریکی نا جون خننگانے۔
پولیس نا رد ئٹ محمد یوسف ریکی نا جون مستونگ نا علاقہ کردگاپ ئٹ گرگینہ کلی شربت خان آن خننگانے۔
علاقہ نا لیویز انچارج غلام سرور نا پاننگ ءِ کہ گمان مریک جون منہ ساعت (گھنٹہ) مُست ئناس خننگک و کھسفنگوک بندغ نا کاٹُم و بدن نا جتا جہہ تیا سُم خلنگانے۔ جون ئے المی کاروائی کن کوئٹہ غا رادہ کننگو۔
نوشکی پولیس نا سروک ایس پی اللہ بخش نا رد ئٹ ڈی ایس پی محمد یوسف ریکی نوشکی ٹی سب ڈویژنل پولیس افسر (ایس ڈی پی او) نا ذمہ واری تیا اسک۔ اودے پنچ دے مُست نوشکی آن سوراب آ تینا اُراغا ہِننگ وخت آ مستونگ نا علاقہ کردگاپ نا خُڑک نادرست آ بندغ آک برمتہ کریسُر۔
پولیس کوالخواہ تا پاننگ ءِ کہ برمتہ و خون ئنا سوب دائسکان سما تمتنے۔
