اقوام متحدہ نا ورکنگ گروپ و خاص نمائندہ آک حکومت پاکستان کِن اواری ئٹ خط ئس نوشتہ کرسا بلوچستان ئٹی بندغ حق آتا خلاف ورزی آ سخت فریشانی نا درشان ئے کرینو
13 اگست 2025 آ شنگ مروکا دا خط ئٹی حوالکار و بندغی حق آتا باسک عبداللطیف بلوچ و اونا مار سیف بلوچ نا بیدس عدالت آن کوش، اونا خاہوت نا برخلاف کاروائی و چاگڑدی باسک گلزار دوست نا دزگیری آ پاکستان آن وضاحت خواہانو۔
خط ئنا رد ئٹ 24 مئی 2025 آ ضلع آواران نا علاقہ مشکے ٹی عبداللطیف بلوچ ئے اونا اُراٹی سلاہ بند بندغ آک سُمکاری کرسا خلکُر و اونا مار سیف بلوچ ئے 28 فروری آ لشکری کارندہ آک دزگیر کریسُر و اونا جون 26 مارچ آ خننگا۔ خط ئٹی پاننگا کہ عبداللطیف مُست ہم دزگیر و تشدد نا گواچی کننگانے و اونا ایلم رشید علی بلوچ 2011 ٹی خلنگ مسُنے۔
اقوام متحدہ نا ماہرین آک چاگڑدی باسک گلزار دوست نا دزگیری آ ہم سوال کرینو۔ ہرادے 06 جولائی آ تربت آن اونا اُراغان دزگیر کرِسہ دہشت گردی نا دوبہ خلنگا واہم دزگیری نا وخت پین وارنٹ تننگ متو۔ پدا او 01 اگست آ ضمانت ئٹ آجو مس۔
اقوام متحدہ نا نمائندہ آک تینا خط ئٹی پارینو کہ بلوچستان ئٹی بندغی حق آتا باسک، حوالکار و بلوچ اقلیت ئے بیدس عدالت آن کوش، زوراکی ئٹ بیگواہی و انسداد دہشتگردی نا قانود آتا رد انگا کارمرز مونی بسُنے، ہرا جہانی سطح آ فریشانی نا سوب ءُ۔ نمائندہ آک حکومت پاکستان آن ہفت نکات آتا وضاحت خواہانو، ہرافتیٹ عبداللطیف ، سیف و رشید بلوچ نا کوش ئنا آزاد انگا پٹ و پول، گلزار دوست نا دزگیری نا قانودی بنیات و انسداد دہشت گردی نا قانود تیٹی اصلاح آک اوار ءُ۔
خط ئٹی زور شاغِنگانے کہ پاکستان تینا جہانی ذمہ واری تا رد ئٹ زند ئنا حق، اظہار رائے نا آجوئی و بندغ حق آتا رکھ ئے یخینی جوڑ کے۔
