آواران نا علاقہ مشکے ٹی نادُرست آ سلاہ بند بندغاک سُم کاری کرسہ اسِہ بند ئس کھسفیر اندن پنجگور نا علاقہ پروم آن پاکستانی لشکر اسہ بندغ ئس بیگواہ کرے۔
جہی حوال تِروک نا رِد ئٹ مشکے ٹی خلنگ مروک بندغ بدل نا مار ہدایت اللہ نا پِن ئٹ درست مسنے، ہرا مشکے نا علاقہ کالار نا جہی ئس ءِ ہرادے استو سلاہ بند بندغاک سُم کاری کرسہ کھسفینو۔
ایلو کنڈ آن بلوچستان نا علاقہ پنجگور آن پاکستانی لشکر حلیف پنیئو ورنا ئس دزگیر کرسا بیگواہ کرے۔
جہی حوال تِروک آتا رِد ئٹ بیگواہ کننگوک حاصل نا مار حلیف بلوچ پروم گیشتی بازار نا جہی ئس ءِ۔
پن کروک ورنا نا موبائل و شناختی کارڈ ئے مُسِہ دے مُست پاکستانی لشکر اونا اُراغا چھاپہ خلنگ نا وخت آ دریسس۔ درو اودے فون کرسہ کیمپ آ خواہفیسس و تینا موبائل و شناختی کارڈ ئے دننگ نا پاریسس۔
حوال تا رد ئٹ حلیف کیمپ آن تینا فون و شناختی کارڈ ئے ہلنگ آن گڈ اُراغا بننگ ئٹی مسنے کہ فوج ئنا ڈھکوک ادارغاتا کارندہ غاک اودے بیگواہ کرینو۔
