یک و نیم تُو مُست زیارت نا علاقہ زیزری آن تینا مار تون اوار سلاہ بند بندغ آتا دو آن دزگیر کننگوک اسسٹنٹ کمشنر محمد افضل ئے بیگواہ کروک آک کھسفیر۔
لیویز آن رسینگوک حوال تا رد ئٹ محمد افضل نا جون زیارت نا علاقہ زردآلو آن خننگانے۔
حوال تا رد ئٹ منہ دے مُست اودے بیگواہ کروکا بندغ آک اونا ویڈیو ئس شنگ کریسُر ہراٹی بیگواہ کننگوک اسسٹنٹ کمشنر اوفتا خواست آتا پوروی نا ہیت ئے کریسس۔
واہم اونا دزگیری و بیگواہی نا ذمہ واری ئے ہچو تنظیم یا ٹولی ئس ہرفتویسس۔
خیال ئٹ مرے مُسہ تو مُست تربت آن اسسٹنٹ کمشنر حنیف نورزئی ئے ہم سلاہ بند بندغ آک دزگیر کرسا نادرستو جہہ ئس دریسُر، واہم اودے پدان یلہ کننگا و دا کاروائی نا ذمہ واری ئے م بلوچستان لبریشن فرنٹ ہرفیسس۔
