بلوچستان نا ضلع واشک نا علاقہ بیسیمہ ٹی، پاکستانی لشکر نا دو آن زوراکی ئٹ بیگواہ کننگوک ماہ جبین و یونس نا زوت آجوئی کِن برانز کننگا۔
برانزیک یونس و ماہ جبین نا فوٹو و پلے کارڈ آتِہ دو ٹی ہرفِسہ نعرہ خلُکر و زوراکی ئٹ بیگواہ کننگوک بندغ آتا زوت آجوئی نا خواست ئے کریر۔
دا برانز بیسیمہ نا بنجائی چوک آ اڈ تننگ مس، ہراٹی چُنا نیاڑی و الس ئنا بھلو کچ ئس اوار مس۔
برانزی ریلی پدان تولوک برانز نا دروشم ئے ہلک ولے اسسٹنٹ کمشنر حبیب کاکڑ تون مروک ہیت و تران آن پد برانز ایسر کننگا، برانزیک پاریر کہ بیست و چھار ساہت ئٹ ماہ جبین و یونس آجو کننگ مریر۔
خاہوت نا پارہ غان اسہ پریس ریلیز ئسیٹ پاننگا کہ اگہ بروکا بیست و چھار ساہت ئٹ ماہ جبین و یونس آجو کننگ متور گُڑا نن دوارہ برانز بناء کرون۔ او پاریر کہ اگہ ماہ جبین یا یونس ئے نسخان مس تو دا نا تیبہ ذمہ واری ریاست و ریاستی ادارہ غا تا مرو۔
خاہوت بلوچ الس آن خواست کرینے کہ دا سخت انگا وخت ئٹ او اوفتتون اوار سلر، اوفتا توار جوڑ مریر و سوشل میڈیا غا دا زوراکی تا برخلاف توار بڑز کیر۔
خیال ئٹ مرے 29 مئی آ ایف سی و ڈھکوک ایجنسی تا کارندہ غاک سول اسپتال شال آن بلوچستان نا ہند بسیمہ نا جہی ماہ جبین بلوچ ئے دزگیر کرسا تینتو دریسُر، اندن 21 مئی آ ماہ جبین نا ایلم محمد یونس ئے پاکستانی لشکر اونا اُرا غا چھاپہ خلسہ تینتو اوار دریسس، ہراڑان پد تومکا بیگواہ ءُ۔
