بلوچستان نا ضلع حب چوکی نا ہند وندر کھرکھیڑہ چیک پوسٹ آن خُڑک ڈیزل آن لوڈ لاری آ کوسٹ گارڈ کارندہ آتا سُمکاری ، سُمک لاری نا ٹائر آتا لگنگ آن پد لاری ڈرائیور نا دو آن پیش تمیسہ کھڈ ئٹی تما ہرانا سوب آن لاری ڈرائیور ساہ تا ۔
تدینی آن پد ٹرنسپورٹر آک کھر کھڑی جیڑائی موڑ نا جاگہ آ جون ئے تخیسہ برانز کریر و کوئٹہ کراچی نا بھلا کسرئے بند کریر ۔
خلنگ مروکا ڈرائیور نا خاوت کوسٹ گارڈ کارندہ آ تا دوبہ خلکُنے کہ اوفتے بھتہ تفننگ آ ہنوکا لاری آ سُمکاری کریر ہرنا سوب آن سُمک ٹائر آ تا لگار و لاری دو آن پیش تمیسہ کھڈ ئسیٹی تما و ڈرائیورساہ تس ۔
وندر تدینی نا برخلاف برانز کوئٹہ ، کراچی نا بھلا کسر آ برجاءِ ہرانا سوب آن کسر بندءِ۔
ٹرانسپورٹر مالک و ڈرائیور آ تا پاننگ ءِ کہ دا اولیکو تدینی ہراڈے کھر کھیڑا کوسٹ گارڈ آ تا نیمہ آن دنو تدینی ئس کننگانے، دا چیک پوسٹ سال آتیان دا روٹ آ ہنوکا لاری تان بھتہ ہلنگ و اوفتے تنگ کننگ ئٹی اوارءِ، کیہی وخت آ ڈرائیور و مسافر آتے تشدد نا گواچی کننگانے۔
یاتی مرے کہ ہندا چیک پوسٹ آ زالبول آ تا تذلیل و بھتہ خوری تہ برخلاف داکان مُست کوئٹہ ،کراچی کسر آ سفر کروکا مسافر آک برانز کرینو ۔
ہندا رد ئٹ اسلام آباد برانز ئنا بھلُنی کروکا ڈاکٹر ماہ رنگ پارے کہ ڈرائیور آک تینا چُناتا پڈ اکن مزدوری کیرہ ولے ریاست ئے دا ہم برداشت اف دا بلوچ ڈرائیور آتا اولی تدینی اف داکان مُست پروم،پنجگور،زامران،دشت،واشک،دالبندین،نوکنڈی،سوراب تون اوار کیہی ہنداتیٹی بلوچ ڈرائیور لشکر ایف سی و کوسٹ گارڈ نا نیمہ آن ناحق خلنگانو۔
او پارے کہ بلوچ ڈرائیور آک لاوارث افس کہ ہرافتے ریاست ہردے بے دردی ئٹ خلنگءِ۔نن بلوچ ڈرائیور آتون سلوک اُن و اوفتے کن سیاسی و قانونی جنگ ہم کرون۔
