تربت: کاریمی آ چاگڑدی باسک وسیم سفر ئے سی ٹی ڈی وے ساڑی مننگ آ آیف آئی آر درج کرسا قانودی کاروائی نا نشانہ کرینے۔ او کیہی تو آن فورتھ شیڈول ئٹی اوار اسک۔
دا رد ئٹ وسیم سفر پارے کہ بلوچستان ئٹی ریاست نا تاغت تخوک آک ڈیہی و جہانی جمہوری اقدار آتے نت تا شیف آن لتاڑِسہ تاغت نا زور آ سیاسی آ توار آتے بے توار کننگ کن ہڑدے پوسکنو چم کارمرز کننگ ءُ۔ سی ٹی ڈی کنا برخلاف وے قانودی دروغو مقدمہ درج کرسہ کنے وے قانودی ئٹ پھاسیفنگ نا کوشت کننگ ءِ۔ دا مقدمہ آتیٹی ہرا دوبہ آتے خلنگانے۔ سی ٹی ڈی نا کنڈ آن ہراڑان نن نہ بلکن ننا فرشتہ آک ہچ سوہوی تخپسہ و نئے کہ دا وڑ ئنا قانودیئو او گڑا ئس نن جوانو وڑ ئسے ئٹ تھانہ و نئے کہ پولیس اسٹیشن ئسے آن رسینگانے۔
او پارے کہ ساف پاش ءِ کہ بلوچستان ئٹی ریاستی ادارہ آک تینا زوراکی و بیدادی نا برخلاف توار ہرفوکا ہر بندغ نا برخلاف دنو چم کارمرز کرسہ کرور ہرا ریاست و ریاست نا تاغت تخوکا قوت آتا زوراکی بیدادی تا برخلاف توار ہرفے و دنیا ئے تینے آ مروکا بیدادی تے نشان ایتِہ۔
وسیم سفر ودیک پارے کہ بلوچستان ئٹی بلوچ ورنا تا زوراکی ئٹ بیگواہی وے قانودی دزگیری و خلنگ بٹنگ نا برخلاف توار ہرفنگ، زوراکی ئٹ بیگواہ کننگوک آتا خاہوت آتتون کمک کننگ و قومی زر و مڈی تا لٹ و پل، بلوچ زنک کشی، لس کھسفنگ نا برخلاف توار ہرفنگ ڈوہ ئس ءِ تو اسہ سیاسی باسک ئسے نا حیثیت ئٹ دا ڈوہ ئے کرسہ کرون۔ دا وڑ ئنا دروغ ئنا مقدمہ و سٹیئو دوبہ خلنگ آن نن خُلوفَن و نئے کہ دا سٹی آ دوبہ آتا ذریعت ئٹ او سیاسی باسک آتے بے توار کرسہ او تینا گندہ انگا ڈوہ تے دنیا آن ڈھکنگ کیرہ۔
او پارے کہ ریاست و ریاست نا تاغت تخوکا تا کنڈ آن خلنگوک آ دوبہ آتے عدالت ئٹی ہتو، زوراکی بیدادی و وے قانودی نا برخلاف ہر پڑ آ توار ہرفنگ آن نن تینے توپنہ، اینو بلوچ نا چنا چنا ریاست نا ادارہ و ریاست نا کنڈ آن مروک زوراکی و ظلم آتے آن واخب ءِ۔
