بلوچستان نا ضلع سوراب و خضدار نا تحصیل زہری نا کیہی علاقہ غاک اینو چھار بجہ غان حساس پاننگانو و بھلو کچ ئسیٹی لشکر کشی بناء کننگانے۔
ضلعی انتظامیہ الس آن خواست کرینے کہ او دا علاقہ تیا ہنپس و بے المی مَش یا زیمی علاقہ تیا مون کپس۔
اسسٹنٹ کمشنر زہری نا کنڈ آن اعلامیہ ٹی پاننگانے کہ انجیرہ، نجیرہ، ارچینو، گرماپ، گزان، بلبل و ہیب ئہ کھیب ئنا علاقہ تیٹ خطرہ آتا سوب آن رکھوئی گھام ہرفنگانے۔
حوال تروکا تا رد ئٹ دا علاقہ تیٹ دا وختا لشکر کشی برجاء ءِ۔ پاکستانی لشکر نا چِھل آن زیات گاڑی کارروائی ٹی اختہ ءُ۔ و بھلو کچ ئسیٹی لشکری کارندہ غاک علاقہ ٹی ساڑی ءُ۔
ایلو کنڈ آن بلوچستان نا ضلع قلات نا علاقہ گراپ ئٹ پاکستانی لشکر ئے بمب تراک ئٹ ٹِک کننگانے۔
حوال تا رد ئٹ نادرست آ بندغ آک پاکستانی لشکر نا بمب ڈسپوزل اسکواڈ نا پندھ ئٹ ہنوک کارندہ تے ہموتم ٹک کرینو ہراتم او کسر ئے ساف کننگ ئٹ اختہ اسُر۔
جہی حوال تا رد ئٹ تراک ئٹ پاکستانی لشکر نا کارندہ تے نسخان تون مون تروئی تمانے۔
کولخواہ تا پارہ غان دا رد ئٹ دائسکان ہچو بیان مونا بتنے۔
