بلوچ نوشتہ کار یاسین غنی بلوچ نیشنل موومنٹ نا اسہ مچی ئسے آن تران کرِسہ پارے کہ چین ئنا پام تننگ نا سوب گوادر و مڈیک ءُ، ہندن دے کیہلینگی تاغت آک دا علاقہ نا بدل مروک سیاست آ نظر تخانو۔ خیسُن، آہِن، کرومائیٹ، پوغ، گیس، سلفر، کاپر، تیل و پین بھاز قیمتی آ مڈیک داڑے اریر، ہرا جہانی معیشت و ٹیکنالوجی کن اہم ءُ۔ دا مڈی تا جہانی خواست ئنا سوب آن بلوچستان داسہ جہانی تاغت و سرمایہ دار آتا نظر ئٹی بسُنے۔ ایلو پارہ غا اسہ قوم ئسے نا دروشم ئٹ نن تینا مڈی تا رکھ ئے امر کننگ ئٹی اُن۔ دا ننا دوٹی ءِ ولے وخت ئنا نازرکی تے پُہہ مرِسہ ننے فیصلہ کروئی مرو۔
دا خیال آتا درشانی ئے او بلوچ نیشنل موومنٹ نا ادارہ تعلیم و تربیت(کیپسٹی بلڈنگ کونسل) نا کنڈ آن "قدرتی مڈی، و جہان نا نظر ئٹی اوفتا اہمیت و جوانی” نا سرحال آ تعلیمی مُچی آن تران کرِسہ کرے۔ مُچی نا سنبھالوک برطانیہ ہنیکن نا سنگت اعجاز بلوچ اسک۔
بلوچستان نا مڈی تا بارو ئٹ او گیشتر پارے کہ بلوچستان دنیا ٹی قدرتی مڈی تا حوالہ ئٹ سیر انگا علاقہ تا لڑ ئٹ اوار ءِ۔ ہندا مڈیک بلوچستان ئے کوزہ گیر آتا نشانہ غا تخانو۔ ہمر کہ پاکستان نا کنڈ آن گیس، سنگ مرمر، پوغ، کرومائیٹ و پین مڈی تا مرے یا چین ئنا دروشم ئٹ سیندک پروجیکٹ مرے یا باسُن آ دیر آتے اسکان سر مننگ۔ چین دا منصوبہ غاتے آ ارب آ ڈالر آتا کچ خڑچ کرینے تانکہ اونا علاقہ دا مڈی تے آن سیر مرے۔
یاسین غنی گیشتر پارے کہ نن چانہ کہ بلوچستان نا دا علاقہ بھازیکا سیندک آن خیسُن و آہن بھلو کچ ئسے ئٹ کشنگ مننگ ئٹی ءِ۔ ولے جہی آبادی ئے بیرہ ماحول نا تباہی و فوجی چوکی رسینگانے۔ ہندن بلوچستان نا گیشتر ہند آتے "حساس” پارِسہ فوجی زون جوڑ کننگانے۔ سیکورٹی چیک پوسٹ آتے آ بندغ آتے ذلیل کننگ، زوراکی ئٹ بیگواہی و وے عدالت کھسفنگ ہڑدے نا کاریم ئس جوڑ مسُنے۔ بلوچ نا ورنا تے بیرہ شک ئنا بنیات آ بیگواہ کننگِک۔ دا کھل ظلم و بیدادی ٹی چین ئنا وڑ انگا سامراج نا اہمو کڑد ئس ءِ۔ انتئے کہ اوسمجھِرہ کہ پد سلوک آ قوم آتے بیدادی نا گواچی کرِسہ اوفتا موقف آن بیگانہ جوڑ کننگ مریک۔
یاسین غنی نا پاننگ اسک کہ ایہُن نن دا راستی آن نمن کننگ کپنہ کہ ہراڑے مزاحمت زیات مرے ہموڑے دنیا ہم سرمایہ کاری آن تینے پدی تورِک و دا بلوچ آتا خوش قسمتی ءِ کہ بلوچ نا علاقہ ٹی مزاحمت جوانو وڑ ئسے ئٹ مننگ ئٹی ءِ ہرانا سوب آن سرمایہ دار آک تینا زر ئے خڑچ کننگ آن تینے تورینو۔ انتئے کہ اوفتے دا گڑا نا سما ءِ کہ ہندنو علاقہ ئس ہراڑے مزاحمت مننگ ئٹی ءِ اوڑے سرمایہ کاری منکن اف۔
