بلوچ لبریشن آرمی نا ترجمان جیئند بلوچ تینا شنگ کروک بیان ئٹ پارے کہ ننا سرمچارک کوئٹہ و پنجگور ئٹ اِرا جتاؤ جلہو تیٹ سی ٹی ڈی و ڈیتھ اسکواڈ نا کارندہ غاتے ٹک کریر۔
او پارے کہ اینو شام ئنا، کوئٹہ نا علاقہ جنگل باغ ئٹ بلوچ لبریشن آرمی نا سرمچارک کوزہ گیر پاکستانی لشکر نا جوڑ کروک کاؤنٹر ٹیررزم ڈیپارٹمنٹ (سی ٹی ڈی ) تون اوار افسر امجد ابابکی، سکنہ کلی سردہ سریاب کوئٹہ ئے سلاہ بند جلہو ئٹ مرگ ئنا گواچی کریر۔
ترجمان پارے کہ امجد ابابکی ہنوکا وخت ئٹ سیٹلائٹ ٹاؤن سریاب و شالکوٹ تھانہ تیٹ مسنے۔ دا آلہ کار بلوچ ورنا تے زوراکی ئٹ بیگواہ کننگ اوفتا بیدادی کننگ، ارا تیا چھاپہ خلنگ نا وخت آ زالبول و کماش آتا بے شرفی ئے کننگ تون اوار دروغ ئنا مونتس آتیٹ اوار مسنے۔
او ودیک پارے کہ ہندا آلہ کار چُنک سن ورنا تے بلیک میل کرسہ اوفتا عزت نفس ئے کتاڑنگ ئٹ تُد اس و اوفتِے ریاست کن مخبر نا وڑ کاریم ئٹ ہیسکہ۔ کوزہ گیر لشکر و ڈھکوک ادارہ غاتا مختفی ٹی اودے بھتہ ہلنگ نا وار دوئی اس۔
او پارے کہ سی ٹی ڈی نا دا کارندہ منیر احمد روڑ، کوئٹہ آ اسہ مرکز ئس جوڑ کریسس۔ ہرانگا او ورنا تے زورانسری بیگواہی آن پدا اوفتیا بیدادی کریکہ۔ بلوچ لبریشن آرمی نا سرمچارک بلوچ کش کاریم تیٹ اوار دا آلہ کار ئے انجام آ سر کریر۔
اونا پاننگ اس کہ اندون یک مئی نا نن، پنجگور نا علاقہ خدابادان ئٹ بی ایل اے نا سرمچارک کوزہ گیر پاکستانی لشکر و ڈھکوک ادارہ غا تا جوڑ کروک ڈیتھ اسکواڈ نا بھلا فرحان نا جاگہ ئے ٹک کریر۔ دا جلہو ئٹ ٹھکانہ نا دروازہ غا ساڑی ڈیتھ اسکواڈ نا کارندہ غاک ہموتم مرگ ئنا گواچی مسر۔ رکھ اکن جوڑ کروک چوکی آ گرنیڈ لانچر تیٹ کیہی گولہ خلنگا۔
جیئند بلوچ ایسر ئٹ پارے کہ بلوچ لبریشن آرمی دا تومکا جلہو تا زمہ واری ئے ہرفک۔ و دا عزم ئے بھیرو کیک کہ کوزہ گیر پاکستانی لشکر و اوڑتون اوار مروکا بلوچ الس آ کروک ظلم آتا ہر دروشم ئٹ حساب ہلنگ مرو۔
