گوادر پورٹ نا مالیاتی انتظام آتا بابت ئٹ داسہ انکشاف ءِ کہ بلوچستان نا معاشی لُٹ ئہ پُل ئے پین ودفنگ ءُ۔
سرکاری دستاویز و سینیٹ ئٹی پیش کننگوک معلومداری تا رِد ئٹ بلوچستان نا گوادر پورٹ ئنا کھٹ ئنا 91 درسد چینی کمپنی “چائنا اوورسیز پورٹس ہولڈنگ کمپنی (COPHC) ئے رسینگ ءِ۔
معلومداری تا رِد ئٹ ایلو 9 فیصد پاکستان نا بنجاہ ئے رسینگک ہراٹی بلوچستان نا ہچو ونڈ ئس افک۔
دا معاہدہ “بلڈ آپریٹ اینڈ ٹرانسفر “ (BOT) ماڈل نا رِد 40 سال کِن کننگانے دا نیام ئٹ چینی کمپنی پورٹ ئے جوڑنگ، آپریشن و تجارتی شیف ئہ بُڑزی تا خواجہ مریک۔
معاہدہ نا رِد ئٹ گوادر پورٹ نا 40 سال خواجہی آن پد پاکستان ئے رسینگو ولے دا نیام ئٹ بلوچستان حکومت ئے کھٹیا یا عمل دخل ئٹی ہچو حق ئس رسینگپرو۔
گوادر فری زون آن رسینگوک آ 85 درسد بخش چینی کمپنی تِہ رسینگو، گوادر پورٹ اتھارٹی ئے بیرہ 15 درسد بخش رسینگو واہم بلوچستان حکومت ئے یا جہی ادارہ غاک اوار آفس۔
جہی رہنما و چاگڑدی باسک آک دا معاہدہ ئے اسِہ ہندونو ماڈل ئسے نا علامت پارینو ہرا جہی وسائل آتِہ ڈنی سواد آتیکن کاریم ئٹ ہتنگ مرور۔ دا مڈی تا بُن مالک بلوچ ئے تیبہ نظرانداز کروک ءِ۔
اوفتا پاننگ ءِ کہ گوادر پورٹ نا پن آ شونداری، نوکری و سہولت آتا ارا قول ئے کنگاسس، ہرا اینو ئسکان پورہ افک، لشکر نا چوکی و زوراکی نا بیگواہیک و پابندی پین لس مسنو۔
بلوچستان ٹی ریاستی زوراکی تون اوار معاشی استحصال اُلس ئنا خار و بے باوری ئے پین ودیفینے۔ گوادر پورٹ نا مالیاتی انتظام آتیا سوج آک ودنگ ءُ و خواست کننگ مننگ ءِ کہ بلوچستان ئے دا ڈٹ بندی ٹی آئینی، سیاسی و مالی حیثیت ئٹ واکدار کننگ مرے۔
آجوئی خواہوک آتیٹی سیاسی تنظیم آک گوادر ئٹی برجاء چینی ڈٹ بندی تِہ استحصالی پارسہ اوفتا مخالفت ئے کننگ ءُ، آجوئی خواہوک سلاہ بند تنظیم آک دا ڈٹ بندی و اوفتون اوار چینی، پاکستانی و ایلو ڈن ڈیہی بندغ آتِہ ٹک کننگ ءُ۔
بلوچ سلاہ بند تنظیم آتا پارہ غان کیہی وار چینی اجنیئر و شاری تِہ ٹک کننگ تون اوار چائنا پاکستانی اکنامک کاریڈور (سی پیک) تون اوار ایلو منصوبہ غاتے نسخان تننگانے۔ خاص بی ایل اے نا مجید برگیڈ نا کنڈ آن بلوچستان تون اوار کراچی ٹی کیہی وار چینی انجینئر و ایلو کارندہ غاتیا جند ندر جلہو کننگانے۔
جہی سروک، چائندار و چاگڑدی باسک آتا پاننگ ءِ کہ گوادر پورٹ آن بارنگا ڈٹ بندی آن رسینگوک آ سواد آک ڈنی ادارہ غاتیسکان ءُ۔ بلوچستان نا اُلس بنداوی آسراتی، روزگار و شونداری آن بد بِٹنگانے، پاکستانی لشکر نا سختی، زوراکی نا بیگواہی و کیمپ آک بے باوری ئے پین ودفنگ ءُ۔
