بی ایل ایف نا ترجمان میجر گہرام بلوچ میڈیا ٹی شنگ کروک تینا درشان ئسیٹی پارے کہ 21 اپریل 2025 سرمچارک آواران نا ہند پیراندر، زومدان آن کوزہ گیر ریاست و ریاست نا بھلنی ٹی اڈ ہلوک ڈیتھ اسکواڈ کن جاسوسی کروکا شاہد ولد ظریف ئے دزگیر کرسا تنظیمی عدالت ئٹی ہیسُر۔ تنظیم نا پٹ ئہ پولی دھر خوڑتی ئٹ و خیالداری ئٹ پٹ ئہ پول ئے پورو کرے، اوکان پد اودے سُمکاری کرسا مرگ ئنا گواچی کرے۔
او پارے کہ شاہد تون مروکا سر سوج آن پھاش مس کہ 11 اکتوبر 2024 آ تنظیمی سنگت کیپٹن طالب بلوچ عرف مودی و سرمچار عادل بلوچ نا شہید کننگ ئٹی اونا دو تُد مسنے۔
ترجمان پارے کہ خیال ئٹ مرے، شہید سرمچار عادل بلوچ، ریاسی جاسوس و ڈوہدار شاہد نا اِلّہ اسک۔ شاہد ریاستی تھالی چٹ آتا ہیت ئٹی برسا تینا اِلا عادل نا مخبری ئے کرسا اودے شہید کرفے۔تنظیم ڈوہدار شاہد ولد ظریف نا بھلا ڈوہ و اونا برخلاف ثبوت آتے ہرسا اودے سزائے موت تننگ نا فیصلہ کرے۔ سرمچارک تنظیمی فیصلہ آ عمل کرسا اینو 04 مئی آ شاہد ئے اونا ایسر آ سر کریر۔
بیان ئٹی پاننگا کہ بی ایل ایف صاف پائک کہ مراعت و لالچ ئٹ برسا بلوچ سرمچار تا برخلاف کاریم کننگ و اوفتا مخبری ئے کرسا دشمن ئے حوال تننگ لُمہ وطن بلوچستان نا دلالی و بلوچ راج و راجی تحریک آجوئی تون اسہ بھلو غداری ئس ءِ۔
او پارے کہ شاہد، آواران، کولواہ و جھاؤ ٹی اڈ مروکا ڈیتھ اسکواڈ نا سرکڑدہ و ریاستی جاسوس و اورنگزیب بزنجو نا بھلنی ٹی اڈ ہلوک نیٹ ورک ئٹ جاسوسی کریکا۔
ترجمان گہرام بلوچ ایسر ئٹ پارے کہ بی ایل ایف ریاستی مخبر شاہدئے خلنگ نا زمہ واری ئے ہرفک و میڈیا ٹی پڑو کیک کہ ریاستی جاسوس تا تروکا حوال تے ہُرسا اوفتا نیٹ ورک نا برخلاف سخت کاروائی کننگ مرو۔ آواران نا ہندی تے سرپند کننگ خوائک کہ او اورنگزیب بزنجو تون اوار ایلو کُل ریاستی جاسوس آتان مُر مریر۔
