بلوچستان نا ضلع زیارت ئٹ تدوکا دے تیٹ سی ٹی ڈی ہفت بندغ خلنگ نا دعوی کریسس، ہرافتا اسٹ نا چاہنداری مسنے۔
وائس فار بلوچ مسنگ پرسنز اسہ چنکو بیان ئس شنگ کرسا پارینے کہ پاکستانی لشکر چوتیر سنجاوی ٹی ہفت بندغ خلنگ نا دعویٰ کریسس۔ اوفتان اسٹ نا چاہنداری غلام نبی نا مار گل محمد مری نا پن ئٹ مسنے، ہرادے 20 دسمبر 2024 آ پاکستانی لشکر سنجاوی آن زوراکی ئٹ بیگواہ کریسس۔
تنظیم نا رد ئٹ، گل محمد مری نا زوراکی نا بیگواہی نا شابیت حوال تِہ خاہوت تنظیم ئے تسس، و اونا کیس زوراکی ئٹ بیگواہ کننگوک بندغ آتا کمیشن ئٹ ہم تننگاسس۔
خیال ئٹ مرے کہ پاکستانی لشکر نا دو آن زوراکی ئٹ بیگواہ کننگوک بندغ آتِہ کھسفنگ نا لڑ برجاء ءِ۔ تدوکا تُو ئٹ دکی ٹی ہم اسہ دروغ ئنا مونتس ئسے ٹی پنچ بندغ کھسفنگاسس۔
