بلوچ نیشنل موومنٹ (بی این ایم) نا جونیئر جوائنٹ سیکریٹری حسن دوست بلوچ برطانیہ ٹی جیئے سندھ فریڈم موومنٹ نا کنڈ آن اڈ تروک سائیں جی ایم سید نا کذیہ دے ئنا مُچی آن تران کرسہ پارے کہ سائیں جی ایم سید نہ بیرہ سندھ بلکن تیبہ برصغیر ئٹی سیاست، فکر و قوم دوستی نا اسہ عظیمو استعارہ ئس ءِ۔ اونا برسی ننے تینا دیہاڑی ورثہ آن تعلقداری آ دوارہ نظر شاغنگ نا وارخواہی ایتِک۔
او پارے کہ سائیں جی ایم سید نا زند ئنا بناء تدینی ئسے آن مس ہراتم او چُنکی ٹی چھوری مسک۔ اونا باوہ نا کوش و برطانیہ نا سامراج نا (ونڈ کننگ و حکومت کننگ) پالیسی اونا خاہوت ئے بھاز زیمی کرے۔ انگریز آتا دو ئنا شیف آ بھلن مننگ آن پد ہم سائیں جی ایم سید اسہ آزات و انقلابی فکر تخوکو سوچ ئسے نا خواجہ مسک۔ بھاز آ بولی تے ہیل کرے و سیاسی شعور ودی کرے۔
حسن دوست بلوچ پارے کہ بیرہ 15 سال ئنا سن ئٹی سائیں جی ایم سید خلافت نا تحریک آن عملی سیاست نا بناء ئے کرے۔ کانگریس و مسلم لیگ ئٹی اوار مننگ آن پد او زوت دا پُہہ مس کہ سندھ ئنا قومی ٹیوار کن جتاؤ جہد ئس المی ءِ۔ ہرانا سوب آن او سندھو دیش تحریک نا بنیات ئے تخا تانکہ سندھ ئنا مڈی و بروکا دے تے آ ہندی بندغ آتا اختیار ئے یخینی جوڑ کننگ مرے۔
تران نا ایسر ئٹ حسن دوست بلوچ پارے کہ اینو نا نازرک آ وخت ئٹی ننے سائیں جی ایم سید نا نظریہ آتیان رہنمائی ہلنگ نا گرج ءِ۔ سندھ و بلوچستان نا دیہاڑی و ثقافتی و سیاسی سیالی ننے آن اوار مرسہ جہد کننگ نا خواست ئے کیک۔ سائیں جی ایم سید نا زند ننے دا سبخ ئے ایتک شعور تعلیم و وے مات کنوک آ عزم غلامی نا برخلاف کھل آن بھلا سلاہ کو۔
